30 قىركۇيەكتەن باستاپ تۇتىنۋشىلىق، كەپىلسىز ونلاين-نەسيە العىسى كەلگەردەردىڭ ويلانۋىنا قوسىمشا ۋاقىت بەرىلەدى. بۇل رەسمي تىلدە «سالقىنداتۋ كەزەڭى» دەپ اتالادى. وسى ۋاقىت نەسيە الاتىن ازاماتتىڭ تاعى ءبىر ويلانىپ، ناقتى شەشىم شىعارۋىنا ارنالعان. ال اقشا شۇعىل قاجەت بولسا، بانك بولىمشەسى نەمەسە مقۇ كەڭسەسىنە بارۋى كەرەك بولادى. بۇل تۋرالى قر قارجى نارىعىن رەتتەۋ جانە دامىتۋ اگەنتتىگى جاريالادى، دەپ حابارلايدى “ادىرنا”.
قازاقستاندىقتارعا قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋدى كۇشەيتۋ ماقساتىندا اعىمداعى جىلعى 30 قىركۇيەكتەن باستاپ تۇتىنۋشىلىق كەپىلسىز ونلاين-قارىزدار بەرۋ كەزىندە "شەشىم قابىلداۋ" كەزەڭى ەنگىزىلەتىنىن ەسكە سالىندى.
"شەشىم قابىلداۋ كەزەڭىنىڭ نەگىزگى ماقساتى – قارىز الۋشىعا ويلانىپ شەشىم قابىلداۋعا ۋاقىت بەرۋ جانە سونىڭ ناتيجەسىندە اسىعىستىقپەن قارىز شارتىن جاساسۋ نەمەسە الاياقتىق سحەمالارعا تارتىلۋ ىقتيمالدىعىن ازايتۋ",- دەپ مالىمدەدى ۆەدومستۆو.
بۇل نورما مەملەكەت باسشىسى 2025 جىلعى 30 ماۋسىمدا قول قويعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن دامىتۋ، قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ، بايلانىس جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قر زاڭىندا بار.
زاڭدى ىسكە اسىرۋ ءۇشىن اگەنتتىك باسقارماسى ونلاين بەرىلەتىن تۇتىنۋشىلىق كەپىلسىز قارىزدار بويىنشا مىناداي شەشىم قابىلداۋ ءتارتىبىن قابىلدادى:
- 150 اەك-تەن (589 800 تەڭگە) 255 اەك-كە (1 002 660 تەڭگە) دەيىنگى سوما كەزىندە بانكتىك قارىز شارتىن جاساسقاننان كەيىن كەمىندە 8 ساعات;
- بانكتىك قارىز سوماسى 255 اەك-تەن (1 002 660 تەڭگە) جوعارى،75 اەك-تەن جوعارى ميكروكرەديت (294 900 تەڭگە) سوماسى كەزىندە كەمىندە 24 ساعات;
- قارىز الۋشىعا اقشانى اۋدارۋعا تەك بەلگىلەنگەن شەشىم قابىلداۋ كەزەڭى وتكەننەن كەيىن ونىڭ كرەديت بەرۋگە كەلىسىمىن العاننان سوڭ رۇقسات ەتىلەدى.
"بانكتەر مەن مقۇ قارىز الۋشىعا 1 كۇن ىشىندە جالپى سوماسى كورسەتىلگەن ليميتتەردەن اساتىن بىرنەشە كرەديت بەرىلگەن جاعدايدا شەشىم قابىلداۋ كەزەڭىن ساقتاۋعا مىندەتتى. بۇل رەتتە شەشىم قابىلداۋ كەزەڭى تاۋارلىق كرەديتتەر بەرۋگە، ىشكى قايتا قارجىلاندىرۋعا جانە تولەم كارتاسى بويىنشا ليميت (150 اەك دەيىن) شەڭبەرىندە قارىزدارعا قولدانىلمايدى", دەلىنگەن حابايلامادا.
ۆەدومستۆو اتاپ وتكەندەي، ەگەر قارىز الۋشى شەشىم قابىلداۋ كەزەڭىندە كرەديت الۋ تۋرالى شەشىمىن وزگەرتسە، قارىز شارتى جويىلادى جانە وعان كرەديت قاراجاتى اۋدارىلمايدى.
"شەشىم قابىلداۋ كەزەڭى تەك ونلاين-قارىزدار ءۇشىن قولدانىلادى جانە ازاماتتاردى الاياقتىقتان قورعاۋعا باعىتتالعان. قارىز الۋشىعا كرەديت قاراجاتى شۇعىل قاجەت بولعان جاعدايدا، ول كەز كەلگەن ۋاقىتتا بانكتىڭ نەمەسە مقۇ بولىمشەسىنە جۇگىنە الادى جانە قارىزدى شەشىم قابىلداۋ كەزەڭىن قولدانباي رەسىمدەي الادى",- دەلىنگەن اقپاراتتا.
