30 qyrküiekten bastap tūtynuşylyq, kepılsız onlain-nesie alǧysy kelgerderdıŋ oilanuyna qosymşa uaqyt berıledı. Būl resmi tılde «salqyndatu kezeŋı» dep atalady. Osy uaqyt nesie alatyn azamattyŋ taǧy bır oilanyp, naqty şeşım şyǧaruyna arnalǧan. Al aqşa şūǧyl qajet bolsa, bank bölımşesı nemese MQŪ keŋsesıne baruy kerek bolady. Būl turaly QR Qarjy naryǧyn retteu jäne damytu agenttıgı jariialady, dep habarlaidy “Adyrna”.
Qazaqstandyqtarǧa qarjylyq körsetıletın qyzmetterdı tūtynuşylardyŋ qūqyqtaryn qorǧaudy küşeitu maqsatynda aǧymdaǧy jylǧy 30 qyrküiekten bastap tūtynuşylyq kepılsız onlain-qaryzdar beru kezınde "şeşım qabyldau" kezeŋı engızıletının eske salyndy.
"Şeşım qabyldau kezeŋınıŋ negızgı maqsaty – qaryz aluşyǧa oilanyp şeşım qabyldauǧa uaqyt beru jäne sonyŋ nätijesınde asyǧystyqpen qaryz şartyn jasasu nemese alaiaqtyq shemalarǧa tartylu yqtimaldyǧyn azaitu",- dep mälımdedı vedomstvo.
Būl norma Memleket basşysy 2025 jylǧy 30 mausymda qol qoiǧan "Qazaqstan Respublikasynyŋ keibır zaŋnamalyq aktılerıne qarjy naryǧyn damytu, qarjylyq körsetıletın qyzmetterdı tūtynuşylardyŋ qūqyqtaryn qorǧau, bailanys jäne artyq zaŋnamalyq reglamentteudı bolǧyzbau mäselelerı boiynşa özgerıster men tolyqtyrular engızu turaly" QR Zaŋynda bar.
Zaŋdy ıske asyru üşın Agenttık Basqarmasy onlain berıletın tūtynuşylyq kepılsız qaryzdar boiynşa mynadai şeşım qabyldau tärtıbın qabyldady:
- 150 AEK-ten (589 800 teŋge) 255 AEK-ke (1 002 660 teŋge) deiıngı soma kezınde banktık qaryz şartyn jasasqannan keiın kemınde 8 saǧat;
- banktık qaryz somasy 255 AEK-ten (1 002 660 teŋge) joǧary,75 AEK-ten joǧary mikrokredit (294 900 teŋge) somasy kezınde kemınde 24 saǧat;
- qaryz aluşyǧa aqşany audaruǧa tek belgılengen şeşım qabyldau kezeŋı ötkennen keiın onyŋ kredit beruge kelısımın alǧannan soŋ rūqsat etıledı.
"Bankter men MQŪ qaryz aluşyǧa 1 kün ışınde jalpy somasy körsetılgen limitterden asatyn bırneşe kredit berılgen jaǧdaida şeşım qabyldau kezeŋın saqtauǧa mındettı. Būl rette şeşım qabyldau kezeŋı tauarlyq kreditter beruge, ışkı qaita qarjylandyruǧa jäne tölem kartasy boiynşa limit (150 AEK deiın) şeŋberınde qaryzdarǧa qoldanylmaidy", delıngen habailamada.
Vedomstvo atap ötkendei, eger qaryz aluşy şeşım qabyldau kezeŋınde kredit alu turaly şeşımın özgertse, qaryz şarty joiylady jäne oǧan kredit qarajaty audarylmaidy.
"Şeşım qabyldau kezeŋı tek onlain-qaryzdar üşın qoldanylady jäne azamattardy alaiaqtyqtan qorǧauǧa baǧyttalǧan. Qaryz aluşyǧa kredit qarajaty şūǧyl qajet bolǧan jaǧdaida, ol kez kelgen uaqytta banktıŋ nemese MQŪ bölımşesıne jügıne alady jäne qaryzdy şeşım qabyldau kezeŋın qoldanbai resımdei alady",- delıngen aqparatta.
