فوتو: قر سىرتقى ىستەر مينيسترلىگى
قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ «Harvest Group» كومپانياسى ديرەكتورلار كەڭەسىنىڭ توراعاسى الماز السەنوۆپەن كەزدەسۋ وتكىزدى. بۇل تۋرالى مينيسترلىكتىڭ ءباسپاسوز قىزمەتى مالىمدەدى، دەپ حابارلايدى "ادىرنا". الايدا كەزدەسۋدىڭ ناقتى ۋاقىتى تۋرالى ايتىلماعان.
تاراپتار اگرو-يندۋستريالىق كلاستەردى قۇرۋ بارىسىن تالقىلادى. العاشقى كەزەڭدە ينۆەستيتسيالىق جوبا جەتىسۋ مەن الماتى وبلىستارىن قامتىپ، 150 مىڭ گەكتار شالعايداعى جانە تىڭايعان جەرلەردى سۋارمالى اۋىل شارۋاشىلىعى القاپتارىنا اينالدىرۋدى كوزدەيدى. جالپى، جوبانى جۇزەگە اسىرۋ اياسىندا زاماناۋي سۋ ۇنەمدەۋ جۇيەلەرىن قولدانا وتىرىپ، 300 مىڭ گەكتار جەردى يگەرۋ جوسپارلانعان.
مينيستر جوبانى ودان ءارى ىلگەرىلەتۋدىڭ ماڭىزدىلىعىن اتاپ ءوتىپ، مەملەكەت تاراپىنان قولداۋ كورسەتۋگە دايىن ەكەنىن ءبىلدىردى.
سونداي-اق كومپانيانىڭ قازاقستاننىڭ بىرقاتار وڭىرلەرىندە تۋريزم جانە سپورت سالالارىندا ينۆەستيتسيالىق جوبالاردى ىسكە اسىرۋ پەرسپەكتيۆالارى بەلگىلەندى.
ءسىم باسشىسى بۇل جوبالاردىڭ ىشكى جانە كىرمە تۋريزم ءۇشىن، سونىمەن قاتار ەكونوميكانى ءارتاراپتاندىرۋ ءۇشىن ءوسۋ مۇمكىندىگىنە اينالۋ الەۋەتى بار ەكەنىن باسا ايتتى.
ايتا كەتەيىك، 4 قىركۇيەكتە Orda سايتى قۇقىق قورعاۋ ورگاندارىنداعى دەرەككوزدەرىنە سىلتەپ، "سىرتقى ىستەر ءمينيسترى مۇرات نۇرتىلەۋ، بيزنەسمەن گادجي گادجيەۆ جانە ۇقك-نىڭ جوعارى لاۋازىمدى قىزمەتكەرلەرى ۇستالعانىن" جازعان ەدى.
سىرتقى ىستەر مينيسترلىگىنىڭ رەسمي وكىلى ايبەك سمادياروۆ مۇرات نۇرتىلەۋدىڭ ۇستالعانى جايلى اقپارات "شىندىققا سايكەس كەلمەيدى" دەپ مالىمدەدى.
ال مادەنيەت جانە اقپارات ءمينيسترى بالاەۆا Facebook جەلىسىندەگى جازباسىندا مۇنى "راستالماعان اقپارات" دەپ، جالعان اقپارات تاراتقان ءۇشىن اكىمشىلىك ءارى قىلمىستىق جاۋاپكەرشىلىك بارىن ەسكەرتتى.
