قازاقستان پرەزيدەنتى قاسىم-جومارت توقاەۆ LY iTECH كومپانياسىنىڭ توراعاسى تسزەن فانتسين مەن HGTECH Co. Ltd كومپانياسىنىڭ توراعاسى ما سينتسياندى قابىلدادى. بۇل تۋرالى اقوردا جاريالادى، دەپ حابارلايدى ”ادىرنا” ۇلتتىق پورتالى.
مەملەكەت باسشىسىنا تۇرمىستىق تەحنيكالاردىڭ، اۆتوكولىكتەر مەن سمارتفونداردىڭ قوسالقى بولشەكتەرىن شىعاراتىن جانە يننوۆاتسيالىق تەحنولوگيالار سالاسىندا جۇمىس ىستەيتىن قىتايدىڭ ءىرى جوعارى تەحنولوگيالىق كاسىپورىندارى جونىندە مالىمەت بەرىلدى.
اڭگىمەلەسۋ بارىسىندا ينۆەستيتسيالىق جوبالاردى جۇزەگە اسىرۋ جانە قوسالقى بولشەكتەر مەن لازەرلىك قۇرىلعى ءوندىرۋ ءۇشىن قازاقستاننان سيرەك كەزدەسەتىن مەتالداردى تۇراقتى تۇردە جەتكىزۋ ءىسىن جولعا قويۋ پەرسپەكتيۆالارى تالقىلاندى، دەلىنگەن حابارلامادا.
سونىمەن قاتار، ەلىمىزدىڭ يننوۆاتسيالىق الەۋەتىن نىعايتۋ ماسەلەلەرى دە قاراستىرىلدى.
قاسىم-جومارت توقاەۆ ەكى ەلدىڭ ستراتەگيالىق سەرىكتەس ەكەنىن، سونىڭ ىشىندە قىتايدىڭ ء"بىر بەلدەۋ – ءبىر جول" جاھاندىق باستاماسى اياسىندا ىنتىماقتاستىق ورناتقانىن اتاپ ءوتتى.
