الماتى وبلىسىندا ەر ادام كيكىلجىڭ كەزىندە ايەلدىڭ تۋعان باۋىرىن اتىپ ءولتىرىپ، كەيىن ونىڭ كىشكەنتاي قىزىن الىپ قاشقان، دەپ حابارلايدى “ادىرنا” ۇلتتىق پورتالى.
مالىمەتتى قر ىشكى ىستەر مينيسترلىگى راستادى. قۇقىق قورعاۋ ورگاندارىنىڭ حابارلاۋىنشا، كۇدىكتى ارنايى وپەراتسيا بارىسىندا ۇستالدى. قىلمىسكەردەن اڭشى مىلتىعىنىڭ وقپانى (وبرەز) تاركىلەندى. قىز بالا امان-ەسەن اناسىنا قايتارىلدى، دارىگەرلەر ونىڭ جاعدايىن تەكسەرىپ جاتىر.
“مينيستر وقيعانىڭ بارىسىن جەكە باقىلاۋىنا الدى. قازىرگى ۋاقىتتا قىلمىستىق ىستەر «ادام ءولتىرۋ» جانە «بالانى ۇرلاۋ» باپتارى بويىنشا تەرگەلۋدە”، — دەلىنگەن مينيسترلىك مالىمدەمەسىندە.
الماتى وبلىستىق پوليتسيا دەپارتامەنتىنىڭ دەرەگىنشە، كۇدىكتى مەن جابىرلەنۋشى بۇعان دەيىن جاقىن قارىم-قاتىناستا بولعان.
الايدا ولاردىڭ اراسىندا جانجال تۋىنداپ، كۇدىكتى ايەلدىڭ باۋىرىن اتىپ ولتىرگەن. ارتىنشا بالانى ۇرلاپ، وقيعا ورنىنان قاشىپ كەتكەنى تۋرالى اقپارات تاراعان.
پد دەرەگىنشە، قازىر كۇدىكتى ۋاقىتشا ۇستاۋ يزولياتورىنا قامالدى. دەپارتامەنت وكىلدەرى بارلىق ءمان-جاي تولىق انىقتالاتىنىن مالىمدەدى.
