مەملەكەت باسشىسى قاسىم-جومارت توقاەۆ 8 قىركۇيەكتەگى قازاقستان حالقىنا جولداۋىندا بۇقارالىق سپورتتى دامىتۋعا ايرىقشا ءمان بەردى. پرەزيدەنتتىڭ باستامالارىن ۇنەمى قولدايتىن تيمۋر قۇلىباەۆتىڭ Halyk قورى باستاماسىمەن بيىل دا اۋىل بالالارىنا ۇلكەن سپورتقا جول اشاتىن «AUYL SPORT» ءتۋرنيرىن وتكىزەدى. 11 قىركۇيەك پەن 12 قازان ارالىعىندا وتەتىن II وڭىرلىك «AUYL SPORT 2025» ءتۋرنيرى قىزىلوردانىڭ قۇمدى دالاسىنان باستالىپ، ەلىمىزدىڭ بارلىق ءوڭىرىن ارالاپ، مىڭداعان جاس سپورتشىعا شابىت سىيلايدى. تولىعىراق "ادىرنا" ۇلتتىق پورتالىنىڭ ماتەريالىندا.
جەتى سپورت ءتۇرى – مىڭداعان مۇمكىندىك
AUYL SPORT – اۋىل جاستارى ءۇشىن تەك سپورتتىق دودا عانا ەمەس، بولاشاققا سەنىم ۇيالاتاتىن، ۇلكەن ومىرگە قادام باستايتىن ماڭىزدى الاڭ.
بيىل بۇل جوبا ەكىنشى جىل قاتارىنان رەسپۋبليكاداعى اۋىلداردى ارالاعالى تۇر. جوبا اياسىندا 10-15 جاس ارالىعىنداعى سپورتشىلار جەتى سپورت تۇرىنەن باق سىنايدى. ولار كاراتە، بوكس، ەركىن كۇرەس، شاحمات، ۇستەل تەننيسى، باسكەتبول جانە ۆولەيبول. قاتىسۋشىلار ءۇشىن 244 مەدال جيىنتىعى ساراپقا سالىنادى.
سۋرەت: Halyk قورىنىڭ باسپاسوزىنەن
بۇل جارىسقا 100 كاسىبي تورەشى جۇمىلدىرىلىپ، جەرگىلىكتى سپورت باسقارمالارى مەن اككرەديتتەلگەن فەدەراتسيالار تولىق قولداۋ كورسەتۋدە. بۇعان دەيىن اۋىلدا تەك ارمانداپ كەلگەن مۇمكىندىكتەر ەندى اۋىل بالالاردىڭ ءوز قولىنا بەرىلىپ وتىر.
ەڭ باستى جاڭالىقتاردىڭ ءبىرى – ۇستەل تەننيسى بيىل باعدارلاماعا العاش رەت قوسىلدى. قاراپايىم قۇرال-جابدىقپەن شاعىن مەكتەپتەردىڭ وزىندە جاتتىعۋعا بولاتىن بۇل سپورت ءتۇرى اۋىل بالالارى ءۇشىن قولجەتىمدى باعىتقا اينالدى. Halyk قورىنىڭ اتقارۋشى ديرەكتورى عالىمبەك جاقسىلىقوۆ اتالعان سپورت ءتۇرىن نەلىكتەن تاڭدار العاندارىن بىلايشا ءتۇسىندىردى:
ء"بىز ارنايى كوميسسيا قۇرىپ، باپكەرلەرمەن بىرگە اۋىلدا قانداي سپورت تۇرلەرى قارقىندى دامىپ جاتقانىن تالقىلادىق. سول تالقىلاۋلاردىڭ ناتيجەسىندە ۇستەل تەننيسىن ەنگىزۋدى ءجون كوردىك. ويتكەنى بۇل – اۋىل مەكتەپتەرىنە قولجەتىمدى ءارى بالالاردىڭ قىزىعۋشىلىعىن ارتتىراتىن سپورت", – دەدى عالىمبەك جاقسىلىقوۆ.
Halyk قورىنىڭ قولداۋى – اۋىل سپورتىنا سەنىم
جوبانى ۇيىمداستىرىپ وتىرعان Halyk قورىنىڭ اتقارۋشى ديرەكتورى عالىمبەك جاقسىلىقوۆ ءتۋرنيردىڭ ءمان-ماڭىزىنا توقتالىپ، اۋىل سپورتىن دامىتۋداعى ماقساتتارىن اتاپ ءوتتى:
"AUYL SPORT – اۋىل بالالارىنا ارنالعان جارىس قانا ەمەس، ولاردىڭ ارمانىن جۇزەگە اسىراتىن ۇلكەن ارەنا. بيىل تاعى دا 10 مىڭنان استام جاس سپورتشى تەڭدەي مۇمكىندىكپەن جارىسقا قاتىسادى. بۇل – ءبىز ءۇشىن ماقتانىش. اۋىلدان شىققان بالالاردىڭ رەسپۋبليكالىق دەڭگەيدە ونەر كورسەتىپ، ۇلتتىق قۇرامامەن بىرگە جۇلدە الىپ جاتقانىن كورگەندە جۇرەگىمىزدى قۋانىش كەرنەيدى. بۇل جەتىستىك – تەك دارىندى بالالاردىڭ ەڭبەگى عانا ەمەس، ولارعا جاعداي جاساعان بىلىكتى باپكەرلەردىڭ، ۇلكەن ەڭبەك سىڭىرگەن جاتتىقتىرۋشىلاردىڭ دا جەڭىسى", – دەدى ول.
ونىڭ ايتۋىنشا، Halyk قورى ءۇشىن بۇل جوبا ءبىر رەتتىك شارا ەمەس. AUYL SPORT – اۋىل سپورتىن تۇراقتى تۇردە قولداپ، دامىتاتىن ۇزاقمەرزىمدى باعدارلاماعا اينالماق.
اكادەميانىڭ سەرىكتەستىگى جانە جاڭا باستامالار
جوبانى جۇزەگە اسىرۋ اياسىندا 2024 جىلى Halyk قورى مەن قازاق سپورت جانە تۋريزم اكادەمياسى اراسىندا مەموراندۋمعا قول قويىلعان ەدى. سونىڭ نەگىزىندە اۋىلداعى جاتتىقتىرۋشىلاردىڭ بىلىكتىلىگىن ارتتىرۋ، سپورتتىق ادىستەمەلەردى ەنگىزۋ جانە اۋىل جاستارىنا كاسىبي باعدار بەرۋ جۇمىستارى باستالدى.
اكادەميادا وقۋ-سپورت بازاسى جاڭارتىلىپ، “AUYL SPORT” شىعىس جەكپە-جەگى زالى اشىلدى. بۇل – اۋىلدان شىققان جاس سپورتشىلارعا كاسىبي دەڭگەيدەگى جاعداي جاساۋعا باعىتتالعان ناقتى قادام.
اكادەميانىڭ وقۋ-ادىستەمەلىك ءىسى جونىندەگى پرورەكتورى، پروفەسسور نۇرمۇحانبەتوۆا دينارا كەنجەقىزى بىلاي دەدى:
"اۋىل بالالارىنا وسىنداي مۇمكىندىك بەرىلۋى – ءبارىمىز ءۇشىن قۋانىش. بۇل باستاما تالاي دارىندى جاستىڭ جولىن اشىپ، بولاشاق چەمپيونداردىڭ قالىپتاسۋىنا ىقپال ەتەدى. جوبانىڭ عۇمىرى ۇزاق بولىپ، ەلىمىزدىڭ تۇكپىر-تۇكپىرىنەن شىققان جاستاردىڭ ارمانى ورىندالسىن دەپ تىلەيمىز. ءاربىر جەڭىس – جاڭا ارمانعا جول اشاتىن جالىندى قادام", – دەدى ول.
جوبا قانداي ناتيجە بەرىپ جاتىر؟
AUYL SPORT جوباسى 2024 جىلى العاش باستالعاننان-اق ۇلكەن سەرپىلىس اكەلدى. ءبىر جىلدىڭ ىشىندە 200 اۋىلدىق ەلدىمەكەننەن 12 مىڭنان استام بالا قاتىسىپ، ەل تاريحىنداعى ەڭ اۋقىمدى اۋىل جاستارىنىڭ جارىسىنا اينالدى.
ال 2025 جىلدىڭ كوكتەمىندە العاشقى جەڭىمپازدار قازاقستان قۇراماسى ساپىندا سەربيادا وتكەن ISF U-15 گيمنازياداسىنا اتتانىپ، ەل نامىسىن قورعادى. قازاقستاندىق سپورتشىلار 11 مەدال جەڭىپ اكەلسە، ونىڭ تورتەۋى اۋىل بالالارىنان شىققان تالانتتى سپورتشىلاردىڭ ەنشىسىندە بولدى. بۇل – اۋىلدان شىققان بالالاردىڭ دا الەمدىك دەڭگەيدە جەڭىسكە جەتە الاتىنىن دالەلدەدى.
سۋرەتتەر: Halyk قورىنىڭ باسپاسوزىنەن
