پاۆلوداردان جارىسقا اتتانعان ءجاسوسپىرىم فۋتبولشىلار مىنگەن ميكرواۆتوبۋس جول اپاتىنا ۇشىراپ، باپكەر قازا تاپتى، دەپ حابارلايدى "ادىرنا" ۇلتتىق پورتالى.
اقمولا وبلىستىق پوليتسيا دەپارتامەنتىنىڭ مالىمەتىنشە، قايعىلى وقيعا 18 ءساۋىر كۇنى استانا – ەرەيمەنتاۋ – شىدەرتى تاس جولىندا بولعان. الدىن الا بولجام بويىنشا، Mercedes ماركالى ميكرواۆتوبۋس جۇرگىزۋشىسى جۇك كولىگىن باسىپ وزۋعا ارەكەت جاساعاندا، كولىك اۋدارىلىپ كەتكەن.
«ميكرواۆتوبۋستا 14 پەن 16 جاس ارالىعىنداعى 16 بالا جانە ولاردىڭ جاتتىقتىرۋشىسى بولعان. ولار پاۆلوداردان استاناعا فۋتبول جارىسىنا بارا جاتقان»، – دەلىنگەن پوليتسيا دەپارتامەنتى تاراتقان حابارلامادا.وقيعا ورنىندا جاتتىقتىرۋشى كوز جۇمعان. جاس فۋتبولشىلار ءتۇرلى دەنە جاراقاتىمەن مەديتسينالىق مەكەمەگە جەتكىزىلدى. قازىرگى ۋاقىتتا ولاردىڭ جاعدايىن دارىگەرلەر باقىلاپ وتىر. اپاتتىڭ ناقتى سەبەپتەرى انىقتالىپ جاتىر. بۇل وقيعا بويىنشا ءتيىستى ساراپتامالار تاعايىندالىپ، تەرگەۋ امالدارى باستالدى.
ۇقساس جاڭالىقتار
