لەۆ تولستوي اتىنداعى ەكىنشى حالىقارالىق بەيبىتشىلىك سىيلىعى قىرعىزستان پرەزيدەنتى سادىر جاپاروۆقا، تاجىكستان پرەزيدەنتى ەمومالي راحمونعا جانە وزبەكستان پرەزيدەنتى شاۆكات ميرزيوەۆكە بەرىلدى, دەپ حابارلايدى «ادىرنا» ءتىلشىسى ربك-عا سىلتەمە جاساپ.
قورىتىندى داۋىس بەرۋ Radisson Collection Hotel قوناقۇيىندە ءوتتى. قازىلار القاسىنىڭ توراعاسى ۆالەري گەرگيەۆتىڭ ايتۋىنشا، شەشىم ءبىراۋىزدان قابىلدانعان.
بەيبىتشىلىك سىيلىعى قورىنىڭ ءباسپاسوز قىزمەتى بۇل ماراپات اتالعان ەلدەردىڭ كوشباسشىلارىنا «ورتالىق ازيا ايماعىندا بەيبىتشىلىك پەن قاۋىپسىزدىكتى نىعايتۋعا قوسقان زور جەكە ۇلەسى ءۇشىن» بەرىلگەنىن اتاپ ءوتتى. ەسكە سالا كەتسەك، 2025 جىلعى 31 ناۋرىزدا جاپاروۆ، راحمون جانە ميرزيوەۆ تاجىكستاندا مەملەكەتتىك شەكارالاردىڭ ءتۇيىسۋ نۇكتەسى تۋرالى شارتقا قول قويعان بولاتىن.
جەڭىمپازداردى تانىستىرعان ۆالەري گەرگيەۆ 2024 جىلى سىيلىق افريكا قۇرلىعىنا، دالىرەك ايتقاندا افريكا وداعىنا بەرىلگەنىن ەسكە سالدى.
«بۇگىن ءبىز ءۇش ەلدىڭ ءۇش كوشباسشىسىنىڭ ەڭبەگىن اتاپ ءوتىپ وتىرمىز. ءبىز ارقاشان بۇل مەملەكەتتەردى ورتالىق ازيا ەلدەرى رەتىندە اتايمىز. مەنىڭشە، تولستوي اتىنداعى حالىقارالىق بەيبىتشىلىك سىيلىعىنىڭ لاۋرەاتتارىن ىزدەۋ رۋحى ەندى جەر شارىنداعى ۇلكەن ءارى ءارتۇرلى وڭىرلەردى قامتي باستادى»، – دەدى ول.
