قازاقستاندىقتاردىڭ ناقتى جالاقىسى ەۋرازيالىق ەكونوميكالىق وداققا (ەاەو) مۇشە ەلدەرمەن سالىستىرعاندا باياۋ ءوسىپ جاتىر، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
2025 جىلدىڭ العاشقى جارتى جىلدىعىندا بارلىق ەاەو ەلدەرىندە ناقتى جالاقى كوتەرىلگەنىمەن، قازاقستانداعى ءوسىم سيمۆوليكالىق دەڭگەيدە عانا بولدى.
رەسمي دەرەككە سايكەس، بيىلعى قاڭتار-ماۋسىم ايلارىندا قازاقستاندىقتاردىڭ ورتاشا نومينالدى ايلىعى 434,7 مىڭ تەڭگەنى قۇرادى. ناقتى جالاقى (ۆاليۋتالىق اۋىتقۋلاردى ەسكەرە وتىرىپ) ورتا ەسەپپەن 849 دوللاردى عانا قۇراپ، بار-جوعى 0,3%-عا وسكەن.
ءدال وسى تۇستا قىرعىزستاندا ناقتى جالاقى 11,5%-عا، بەلارۋستە – 11%-عا، رەسەيدە – 4,1%-عا، ارمەنيادا – 2,4%-عا ارتقان.
سوعان قاراماستان، دوللارلىق كورسەتكىش بويىنشا قازاقستان ءالى دە رەسەيدەن كەيىنگى ەكىنشى ورىندا تۇر.
ساراپشىلاردىڭ ايتۋىنشا، جالاقى ءوسىمىنىڭ تەجەلۋىنە بيىلعى ءساۋىر مەن ماۋسىم ايلارىندا بولعان ۆاليۋتا باعامىنىڭ كۇرت قۇبىلۋى سەبەپ بولعان. جىلدىڭ ەكىنشى جارتىسىندا دا تەڭگەنىڭ شىلدە-تامىزداعى السىرەۋى ستاتيستيكاعا اسەر ەتپەك.
ۇقساس جاڭالىقتار
