شقو-دا قىمبات مەتالداردى زاڭسىز ءوندىردى دەگەن كۇدىكپەن 19 شەتەلدىك ازامات ۇستالدى. بۇل تۋرالى بۇگىن، 11 قىركۇيەكتە ىشكى ىستەر مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«قۇقىقتىق ءتارتىپ» جەدەل-پروفيلاكتيكالىق ءىس-شاراسى بارىسىندا شىعىس قازاقستان وبلىسىنىڭ پوليتسەيلەرى پايدالى قازبالاردى زاڭسىز ءوندىرۋ فاكتىسىن انىقتاعان.
وبلىستىڭ ءبىر اۋدانىندا 19 شەتەلدىك ازامات پەن وسكەمەن قالاسىنىڭ 2 تۇرعىنى ۇستالعان. قىمبات مەتاللداردى وندىرۋگە ارنالعان ەكسكاۆاتورلار، بۋلدوزەر، ۇساتقىش قوندىرعىلار جانە باسقا دا جابدىقتار، سونداي-اق قۇرامىندا التىن مەن باسقا دا باعالى كومپونەنتتەردىڭ بەلگىلەرى بار مەتالل بۇيىمدارى تاركىلەنگەن.
«اتالعان فاكتى بويىنشا سوتقا دەيىنگى تەرگەۋ باستالدى. تەرگەۋ بارىسىندا قۇقىققا قارسى ارەكەتكە قاتىسى بار بولۋى مۇمكىن 20-دان استام ادام تەكسەرىلۋدە. دالەلدەر جينالىپ، قاجەتتى ساراپتامالار تاعايىندالدى، ءىستىڭ بارلىق ءمان-جايىن انىقتاۋ شارالارى قابىلدانۋدا»،—دەلىنگەن حابارلامادا.
