بەلگىلى دارىگەر، عالىم مارات ورازالين 83 جاسقا قاراعان شاعىندا ومىردەن وزدى. قارالى حاباردى سەمەي مەديتسينا ۋنيۆەرسيتەتىنىڭ ءباسپاسوز قىزمەتى قىزمەتى جەتكىزدى، دەپ حابارلايدى «ادىرنا» ءتىلشىسى.
ء«وزىنىڭ 82 جاسىندا ءبىرشاما ۋاقىتقا سوزىلعان سىرقاتتان كەيىن بەلگىلى عالىم، مەديتسينا عىلىمدارىنىڭ كانديداتى، پروفەسسور، ميكروبيولوگ ورازالين مارات ماۋتقانۇلى ومىردەن ءوتتى. مارات ماۋتقانۇلى 1942 جىلى 15 قازاندا كوكپەكتى اۋىلىندا دۇنيەگە كەلگەن. 1959 جىلى ءبىزدىڭ مەديتسينالىق ينستيتۋتقا وقۋعا ءتۇسىپ، ونى تامامداعان سوڭ ميكروبيولوگيا كافەدراسىندا ەڭبەك جولىن باستاعان. حاركوۆ مەديتسينا ينستيتۋتىنىڭ اسپيرانتۋراسىن ءبىتىرىپ، يممۋنولوگيا بويىنشا ديسسەرتاتسيا قورعاپ، تۋعان وقۋ ورنىنا ورالىپ، ميكروبيولوگيا كافەدراسىنىڭ دوتسەنتى بولدى»،— دەلىنگەن حابارلامادا.
دارىگەر 2002 جىلى سەمەي مەديتسينا ۋنيۆەرسيتەتى ميكروبيولوگيا كافەدراسىنىڭ پروفەسسورى اتاعىن العان. ول — «نەۆادا-سەمەي» قوزعالىسىنىڭ العاشقى بەلسەندىلەرىنىڭ ءبىرى بولعان ازامات. 1989–2000 جىلدارى وسى قوزعالىستىڭ توراعاسى قىزمەتىن اتقارعان. ءار جىلدارى يادرولىق قارۋ ماسەلەسىنە، جاستار تاربيەسى مەن ناشاقورلىق پروبلەمالارىنا ارنالعان حالىقارالىق كونفەرەنتسيالارعا قاتىسىپ وتىرعان.
