فرانتسيانىڭ جاڭادان تاعايىندالعان پرەمەر-ءمينيسترى سەباستەن لەكورنيۋ بۇرىنعى ۇكىمەت مۇشەلەرىنە بەرىلەتىن ءومىر بويعى جەڭىلدىكتەردىڭ كۇشىن جوياتىندىعىن مالىمدەدى. بۇل تۋرالى ول X جەلىسىندە جازدى، دەپ حابارلايدى «ادىرنا» ءتىلشىسى.
ايتۋىنشا، بۇيرىق 2026 جىلدىڭ 1 قاڭتارىنان باستاپ كۇشىنە ەنەدى.
«رەسپۋبليكا قاۋىپ-قاتەرگە ۇشىراعان تۇلعالاردى قورعاۋى ءتيىس، الايدا ولاردىڭ ۋاقىتشا اتقارعان قىزمەتى ءۇشىن ءومىر بويى جەڭىلدىكتەردى پايدالانا بەرۋى — اقىلعا قونىمسىز نارسە»،– دەدى ول.
پرەمەر-مينيستر مۇنداي جەڭىلدىكتەردىڭ ءبىرى پوليتسيالىق قورعاۋ ەكەندىگىن مالىمدەدى. ونىڭ سوزىنشە، الداعى ۋاقىتتا بۇل جەڭىلدىك تەك ەكس-پرەمەر-مينيسترلەر مەن ىشكى ىستەر مينيسترلەرىنە عانا شەكتەۋلى مەرزىمگە بەرىلەدى جانە ناقتى قاۋىپ-قاتەردىڭ دەڭگەيىنە قاراي عانا ۇزارتىلاتىن بولادى.
قازىرگى تاڭدا فرانتسيا زاڭى بويىنشا ەكس-شەنەۋنىكتەر 67 جاسقا دەيىن قىزمەتتىك كولىك پەن جۇرگىزۋشىنى، سونداي-اق جەكە حاتشىنى 10 جىل بويى پايدالۋ قۇقىعىنا يە.
رەسمي دەرەكتەرگە سۇيەنسەك، 2019 جىلى مەملەكەت بۇرىنعى شەنەۋنىكتەردىڭ قىزمەتتىك كولىگى مەن كومەكشىلەرى ءۇشىن شامامەن 1,6 ملن ەۋرو، ال ولاردىڭ پوليتسيا قورعاۋى ءۇشىن تاعى 2,8 ملن ەۋرو قارجى بولگەن.
ايتا كەتەيىك، بۇعان دەيىن فرانتسيانىڭ جاڭا پرەمەر-ءمينيسترى بيۋدجەت تاپشىلىعىن ازايتۋ ءۇشىن ەكى مەملەكەتتىك مەرەكەنى الىپ تاستاۋ تۋرالى فرانسۋا بايرۋدىڭ ۇسىنىسىنان باس تارتقان ەدى.
