الماتى قالاسىندا ورنالاسقان "بايسات" كوتەرمە-بولشەك ساۋدا ورتالىعى اۋكتسيونعا شىعارىلدى. نىساننىڭ باستاپقى باعاسى 28,6 ميلليارد تەڭگە بولىپ بەلگىلەندى، دەپ حابارلايدى "ادىرنا" ۇلتتىق پورتالى.
بۇل تۋرالى قايتارىلعان اكتيۆتەردى باسقارۋ كومپانياسىنىڭ رەسمي سايتىندا جاريالاندى. ساۋدا E-Qazyna پورتالىندا وتەدى. لوت سيپاتتاماسىندا كورسەتىلگەندەي، اۋكتسيونعا كومپانيانىڭ 100 پايىز ۇلەسى قويىلىپ وتىر.
قۇجاتتارعا سايكەس:، ساۋدا ورتالىعىنىڭ جارعىلىق كاپيتالى – 26,3 ميلليارد تەڭگە. ال باعالاۋ كەزىندەگى تابىسى – 2,7 ميلليارد تەڭگە، تازا پايداسى – 1,2 ميلليارد تەڭگە.
اۋكتسيونعا قاتىسۋشىلاردان 2,86 ميلليارد تەڭگە كەپىلدىك جارنا تالاپ ەتىلەدى.
قايتارىلعان اكتيۆتەردى باسقارۋ كومپانياسى ساۋدا-ساتتىق زاڭ اياسىندا ءوتىپ جاتقانىن، ال تۇسكەن قاراجات ارنايى مەملەكەتتىك قورعا اۋدارىلىپ، الەۋمەتتىك ماڭىزى بار جوبالارعا جۇمسالاتىنىن مالىمدەدى.
ايتا كەتەيىك، بۇعان دەيىن كومپانيا "باتا", "بەتاشار", ء"سۇيىندىر" كوللەكتسيالىق مونەتالارى مەن 14 ەكسكليۋزيۆتى قولساعاتتى اۋكتسيون ارقىلى 117 ميلليون تەڭگەگە ساتقان بولاتىن.
