بۇگىن، الماتىدا قالا كۇنىنە وراي المالى اۋدانىنداعى «اسىل» ساۋدا ورتالىعىندا قالالىق كىتاپحانالاردىڭ جاڭا كىتاپ بەرۋ پۋنكتى اشىلدى.
جوبا مەملەكەت باسشىسى قاسىم-جومارت توقاەۆتىڭ «وقيتىن ۇلت» جوباسى اياسىندا قالا اكىمى دارحان ساتىبالدىنىڭ تاپسىرماسى بويىنشا جۇزەگە اسىرىلۋدا. باستامانىڭ نەگىزگى ماقساتى – قالا تۇرعىندارىنىڭ كىتاپقا قولجەتىمدىلىگىن ارتتىرۋ، كىتاپ وقۋعا قىزىعۋشىلىعىن قالىپتاستىرۋ جانە وقۋ مادەنيەتىن دامىتۋ.
كىتاپ بەرۋ پۋنكتىنىڭ اشىلۋ سالتاناتىنا المالى اۋدانى اكىمىنىڭ ورىنباسارى ولجاس قۇرمانبەكۇلى، قازاقستاننىڭ ەڭبەك سىڭىرگەن قايراتكەرى ساۋلە دوسجان، قازاقستان جازۋشىلار وداعىنىڭ مۇشەسى، اقىن، جازۋشى بەيبىت سارىباي، جۋرناليست، جازۋشى بايان بولاتحانوۆا، مادەنيەت سالاسىنىڭ وكىلدەرى جانە قالا تۇرعىندارى قاتىستى.
ءىس-شارا بارىسىندا زيالى قاۋىم وكىلدەرى ءسوز سويلەپ، كىتاپ وقۋدىڭ قوعامداعى ماڭىزىنا جانە ادەبيەتتى تۇرعىندارعا بارىنشا قولجەتىمدى ەتۋدىڭ وزەكتىلىگىنە توقتالدى.
ءوز قۇتتىقتاۋ سوزىندە قازاقستاننىڭ ەڭبەك سىڭىرگەن قايراتكەرى ساۋلە دوسجان كىتاپ بەرۋ پۋنكتىنىڭ ساۋدا ورتالىعىندا اشىلۋ ماڭىزدىلىعىن اتاپ ءوتتى:
«بۇگىن المالى اۋدانىندا تۇرعىندار ءۇشىن ماڭىزدى ءارى قولجەتىمدى مادەني كەڭىستىك اشىلىپ وتىر. كىتاپحانانى ادامدار كوپ كەلەتىن ساۋدا ورتالىعىنا جاقىنداتۋ – كىتاپ وقۋدى كۇندەلىكتى ءومىر سالتىنا اينالدىرۋعا باعىتتالعان جاقسى باستاما. وسىنداي جوبالاردىڭ كوبەيۋى تۇرعىنداردىڭ كىتاپقا دەگەن قىزىعۋشىلىعىن ارتتىرىپ، وقۋ مادەنيەتىن دامىتۋعا ءوز ۇلەسىن قوسادى دەپ سەنەمىن» - دەدى ساۋلە دوسجان.
بۇعان دەيىن وسىنداي العاشقى كىتاپ بەرۋ پۋنكتى «ادەم» ساۋدا ورتالىعىندا اشىلعان بولاتىن. ساۋدا ءۇيىنىڭ كاسىپكەرلەرى مەن كەلۋشىلەرىنىڭ العاشقى كۇننەن باستاپ «وقيتىن ۇلت» يدەياسىنىڭ اياسىندا جۇزەگە اسىرىپ جاتقان بۇل باستاماعا قولداۋ كورسەتىپ، اسا قىزىعۋشىلىق تانىتۋىنا بايلانىستى، قالانىڭ باسقا دا اۋداندارىنداعى ساۋدا ورتالىقتارىندا وسىنداي كىتاپ بەرۋ پۋنكتتەرىن اشۋ ارقىلى تۇرعىنداردىڭ كىتاپقا قولجەتىمدىلىگىن ارتتىرۋ جۇمىستارى جۇرگىزىلۋدە.
ساۋدا ورتالىعىندا كىتاپ پۋنكتىنىڭ اشىلعانىن مۇنداعى كاسىپكەرلەر دە جىلى قابىلداۋدا.
«جۇمىس ورنىمىزدا كىتاپ پۋنكتىنىڭ اشىلعانىنا قۋانىشتىمىن. وسى جەردەن موتيۆاتسيالىق جانە سالالىق كىتاپتاردى الىپ، كاسىبىمىزدى دامىتۋعا كومەكتەسەتىن ادەبيەتتەرمەن تانىساتىن بولامىن. بۇل ءبىز ءۇشىن ۇلكەن مۇمكىندىك دەپ ويلايمىن. وسىنداي يگى باستامانى قولعا العان الماتى اكىمدىگى مەن قالالىق كىتاپحانالارعا العىسىم شەكسىز!» – دەپ اتاپ ءوتتى كاسىپكەر ازامات ينكاروۆ.
بۇگىندە جاڭا كىتاپ بەرۋ پۋنكتىنىڭ قورىندا 2000-نان استام كىتاپ بار. وقىرماندار كوركەم ادەبيەتتەن باستاپ، بالالار ادەبيەتى مەن تانىمدىق باسىلىمدارعا دەيىنگى ءتۇرلى كىتاپتاردى تاڭداي الادى.
جاڭا كىتاپ بەرۋ پۋنكتى سارسەنبى–دۇيسەنبى كۇندەرى ساعات 10:00-دەن 19:00-گە دەيىن جۇمىس ىستەيدى. سەيسەنبى – دەمالىس كۇنى.
المالى اۋدانىنىڭ تۇرعىندارى مەن «اسىل» ساۋدا ورتالىعىنىڭ كەلۋشىلەرىن جاڭا كىتاپ بەرۋ پۋنكتىنە كەلىپ، كىتاپ قورىمەن تانىسىپ، وزدەرىنە قاجەتتى ادەبيەتتەردى تاڭداۋعا شاقىرامىز.
