ءوڭىردىڭ شالعاي اۋىلدارىنىڭ تۇرعىندارىنا مەديتسينالىق كومەك الۋ جەڭىلدەي تۇسەدى. جىل سوڭىنا دەيىن اقتوبە وبلىسىندا 29 جاڭا دەنساۋلىق ساقتاۋ نىسانىن سالۋ جوسپارلانىپ وتىر.
بۇل ماقساتقا 5,6 ميلليارد تەڭگە بولىنگەن، ونىڭ ىشىندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا دا قاراجات قاراستىرىلعان.
قازىرگى ۋاقىتتا جۇمىستار جۇرگىزىلۋدە. ىرعىز اۋدانىنا قاراستى جارما اۋىلىندا مەدپۋنكت، بايعانين اۋدانىنداعى نوعايتى اۋىلىندا فەلدشەرلىك-اكۋشەرلىك پۋنكت، العا اۋدانىنىڭ مارجانبۇلاق اۋىلىندا جانە مۇعالجار اۋدانىنىڭ مۇعالجار اۋىلىندا دارىگەرلىك امبۋلاتوريالار پايدالانۋعا بەرىلدى. تاعى جەتى نىساندا قۇرىلىس جۇمىستارى جالعاسىپ جاتىر، ولاردى وسى جىلدىڭ سوڭىنا دەيىن اياقتاۋ جوسپارلانعان.
سونىمەن قاتار حرومتاۋ، شالقار جانە قاندىاعاش قالالارىنداعى اۋرۋحانالارعا جاپسارلاس قۇرىلىس سالۋعا ارنالعان قۇجاتتاما دايىندالۋدا. جوبالار مەملەكەتتىك ساراپتامادان وتۋدە.
بۇگىندە اۋىل مەديتسيناسىنىڭ دامۋى ستراتەگيالىق مىندەت رەتىندە قاراستىرىلادى: ءاربىر تۇرعىن، مەيلى ول ۇلكەن قالادا بولسىن، شالعاي اۋىلدا بولسىن، ساپالى مەديتسينالىق قىزمەتكە تەڭ قول جەتكىزۋى ءتيىس. جاڭا مەدپۋنكتتەر مەن امبۋلاتوريالار دارىگەرلەردى حالىققا جاقىنداتىپ قانا قويماي، اۋداندىق اۋرۋحانالارعا تۇسەتىن جۇكتەمەنى دە ازايتادى.
جوبانى ىسكە اسىرۋ مىڭداعان اۋىل تۇرعىندارىنىڭ ءومىر ءسۇرۋ ساپاسىن جاقسارتىپ، وڭىردەگى الەۋمەتتىك تۇراقتىلىقتى نىعايتادى دەپ كۇتىلۋدە.
