استانا قالاسىنىڭ ماڭىندا ەكى كۇن بويى حابارسىز كەتكەن ايەل امان-ەسەن تابىلدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەپ.
30 شىلدە كۇنى كەشكە پوليتسياعا قالا تۇرعىنىنىڭ جوعالعانى تۋرالى اقپارات تۇسكەن. تۋىستارىنىڭ ايتۋىنشا، ول تانىسىمەن بىرگە تابيعات اياسىندا دەمالۋعا بارعان، الايدا سوزگە كەلىسپەي قالعاننان كەيىن جالعىز كەتىپ، بايلانىسقا شىقپاي قويعان. سول ساتتەن باستاپ ونىڭ تەلەفونى دا سوندىرىلە باستاعان.
ىزدەۋ جۇمىستارىنا پوليتسيا، توتەنشە جاعدايلار قىزمەتى، كينولوگتار جانە «اسار» ەرىكتىلەر توبى جۇمىلدىرىلدى. ەكى كۇنگە سوزىلعان ىزدەستىرۋ ناتيجەسىندە 1 تامىز كۇنى كەشكە ايەل بەلىنەن تومەن باتپاققا باتىپ قالىپ، وزدىگىنەن شىعا الماي وتىرعان جەرىنەن تابىلدى.
قۇتقارۋشىلار مەن ەرىكتىلەر ونى قاۋىپسىز جەرگە شىعارىپ، مەديتسينا قىزمەتكەرلەرىنە تاپسىرعان. دارىگەرلەردىڭ ايتۋىنشا، ايەلدىڭ ومىرىنە قاۋىپ جوق، وعان قاجەتتى مەديتسينالىق كومەك كورسەتىلدى.
قازىرگى تاڭدا وقيعانىڭ ءمان-جايى انىقتالىپ جاتىر.
