اقش پرەزيدەنتى دونالد ترامپ بۇۇ باس اسسامبلەياسىندا ءسوز سويلەۋ ءۇشىن شتاب-پاتەر عيماراتىنا كوتەرىلىپ بارا جاتقان ساتتە ەسكالاتوردا تۇرىپ قالدى. اق ءۇي بۇل جاعدايعا قاتىستى تەكسەرۋ جۇرگىزۋ كەرەكتىگىن ايتتى، دەپ حابارلايدى «ادىرنا» ءتىلشىسى.
«ەگەر بۇۇ-دا بىرەۋ ەسكالاتوردى پرەزيدەنت پەن ءبىرىنشى حانىم وعان مىنگەن ساتتە ادەيى توقتاتقان بولسا، ول ادامدى دەرەۋ جۇمىستان شىعارىپ، تەرگەۋ جۇرگىزۋ قاجەت»،– دەدى اقش اكىمشىلىگىنىڭ ءباسپاسوز حاتشىسى كەرولاين لەۆيتت.
سونداي-اق ول The Times گازەتىنە جاريالانعان ماقالادان ءۇزىندى كەلتىردى. وندا دۇنيەجۇزىلىك ۇيىم قىزمەتكەرلەرىنىڭ ءوزارا قالجىڭداپ، ەسكالاتوردى ءوشىرىپ قويىپ، سول ارقىلى اقش پرەزيدەنتىن باسپالداقپەن كوتەرۋگە ماجبۇرلەگەندەرى ايتىلعان.
ەسكە سالا كەتەيىك، جۋىردا اقش-تا دونالد ترامپ وتىرعان تىكۇشاققا لازەرلىك شابۋىل جاسالعان ەدى. كۇدىكتى ۆاشينگتوندا ۇستالدى. ول بەس جىلعا دەيىن باس بوستاندىعىنان ايىرىلۋى مۇمكىن.
