سيرەك سپورتتىق كولىككە اعاش قۇلادى. قۇنىن كىم وتەيدى؟

الماتىدا اعاش قۇلاپ،  سالدارىنان جول جيەگىندە تۇرعان اۆتوكولىك زاقىمداندى، دەپ حابارلايدى "ادىرنا" ۇلتتىق پورتالى NUR.KZ-كە سىلتەپ.

الەۋمەتتىك جەلى Threads قولدانۋشىسىنىڭ ايتۋىنشا، وقيعا بۇگىن تاڭەرتەڭ جاڭا تۇرعىن ءۇي كەشەندەرىنىڭ ماڭىندا بولعان. 

اعاش جول جيەگىندە تۇرعان ەلەكتروموبيلگە قۇلاپ، ونىڭ توبەسى مەن كاپوتىن زاقىمداعان.

كۋاگەردىڭ سوزىنشە، اعاش قۇلاعان جەردە جاياۋ جۇرگىنشىلەر بولىگى دە بار، سوندىقتان وقيعا كەزىندە ادامدارعا قاۋىپ ءتونۋى مۇمكىن ەدى.

«ەندى سۇراق تۋىندايدى: مۇنداي جاعدايدا كىم جاۋاپ بەرەدى جانە كولىك يەسىنە كەلتىرىلگەن شىعىندى كىم وتەيدى؟» – دەپ جازعان اۆتور.

الماتى اكىمدىگى بۇل جايتتىڭ المالى اۋدانىندا، تورەقۇلوۆ كوشەسىنىڭ بويىندا بولعانىن مالىمدەدى.

قىزمەتكەرلەردىڭ تۇسىندىرۋىنشە، اعاش تروتۋار بويىندا ورنالاسقان، ءتۇبىر جۇيەسى قورشاۋدىڭ جانىنان ءوسىپ شىققان. ونىڭ ءتۇرى – قاراعاش، جاسى 35 جىلدان اسقان، دىڭگەگىنىڭ ديامەترى 50 ميلليمەتردەن جوعارى.

ۆيزۋالدى تەكسەرىس بارىسىندا اعاشتىڭ سانيتارلىق جاعدايى قاناعاتتانارلىق ەكەنى انىقتالىپ، كەۋىپ كەتكەن بەلگىلەرى بايقالماعان. سوندىقتان سانيتارلىق كەسۋگە جاتپايدى، ال تەك سىرتقى تۇرىنە قاراپ، قۇلاۋ قاۋپىن الدىن الا بولجاۋ مۇمكىن ەمەس ەكەنى ايتىلدى.

اكىمدىك مالىمەتىنشە، HiPhi Z ماركالى كولىككە ماتەريالدىق شىعىن كەلگەن. كولىكتىڭ پانورامالىق توبەسى مەن تىرەۋ بولىگى زاقىمدانعان. كولىك يەسىنە ءتيىستى ءتۇسىندىرۋ جۇمىستارى جۇرگىزىلدى. قازىرگى ۋاقىتتا قۇلاعان اعاشتى شىعارۋ جۇمىستارى اياقتالۋعا جاقىن.