جىل باسىنان بەرى قاراعاندى وبلىسىندا 20 جاڭا ءوندىرىس ورنى ىسكە قوسىلدى. ونىڭ ىشىندە بولات قۇبىر، اليۋميني رادياتورى، فەرروقورىتپا شىعاراتىن زاۋىتتار، سونداي-اق ماشينا جاساۋ سالاسىنداعى جاڭا كاسىپورىندار بار. سونىڭ ناتيجەسىندە ەكى مىڭنان استام تۇرعىن تۇراقتى جۇمىسپەن قامتىلدى. جىل سوڭىنا دەيىن تاعى شامامەن ون جوبا جۇزەگە اسىرىلىپ، قوسىمشا جۇمىس ورىندارى اشىلادى دەپ جوسپارلانۋدا.
ءوڭىر اكىمى ەرماعانبەت بولەكپاەۆ وبلىستىق ءماسليحاتتىڭ سەسسياسىندا حالىق قالاۋلىلارىنا ەسەپ بەرىپ، مەملەكەت باسشىسى جۇكتەگەن تاپسىرمالاردىڭ ورىندالۋ بارىسىنا توقتالدى.
– 2025 جىلعى جولداۋىندا پرەزيدەنت ەلىمىزدىڭ الدىندا وڭدەۋشى ونەركاسىپتى دامىتىپ، وعان جاڭا سەرپىن بەرۋ مىندەتىن قويعان بولاتىن. بۇل باعىت قاراعاندى وبلىسىندا ناقتى جۇزەگە اسىرىلىپ جاتىر. وڭدەۋشى ونەركاسىپتىڭ جالپى وندىرىستەگى ۇلەسى بۇگىندە 76%-دى قۇرايدى. ماشينا جاساۋ سالاسى دا قارقىندى دامىپ كەلەدى: 2025 جىلدىڭ سەگىز ايىندا ونىڭ ءوندىرىس كولەمى 312,5 ملرد تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا 10,5%-عا ءوستى. ناتيجەسىندە ماشينا جاساۋدىڭ وڭدەۋشى ونەركاسىپتەگى ۇلەسى 13%-عا دەيىن كوتەرىلدى. يندۋستريالىق ايماقتا جاڭا جوبالاردى ىسكە اسىرۋ ارقىلى ءبىز ساران قالاسىن مونوقالا مارتەبەسىنەن شىعارىپ، جاڭا جۇمىس ورىندارىن اشۋعا ءارى ەكونوميكانى ارتاراپتاندىرۋعا مۇمكىندىك الدىق، – دەدى ايماق باسشىسى.
سەگىز اي ىشىندە وبلىستىڭ ونەركاسىپتىك ءوندىرىسى 7%-عا ارتتى. تارتىلعان ينۆەستيتسيا كولەمى 645 ملرد تەڭگەگە جۋىقتادى، بۇل وتكەن جىلعى كورسەتكىشتەن 11%-عا كوپ.
جۇمىسسىزدىق دەڭگەيى رەسپۋبليكا بويىنشا ەڭ تومەنگى كورسەتكىشتەردىڭ ءبىرى بولىپ قالىپ وتىر – شامامەن 4%.
تۇرعىن ءۇي قۇرىلىسى دا قارقىن العان: سەگىز ايدا 351 مىڭ شارشى مەتر باسپانا پايدالانۋعا بەرىلدى. جىل سوڭىنا دەيىن 1330 كەزەكتە تۇرعان وتباسى جاڭا پاتەرگە قونىستانادى.
اۋىلدىق ەلدى مەكەندەر مەن قالالاردا اۋىزسۋ جۇيەلەرى جاڭارتىلىپ، گاز تارتۋ جۇمىستارى كەڭەيتىلىپ جاتىر، جولدار جوندەلۋدە. بيىل وبلىستا تازا اۋىزسۋمەن قامتۋ ماسەلەسى تولىق شەشىلەدى دەپ كۇتىلۋدە.
الەۋمەتتىك سالاعا دا ايرىقشا كوڭىل بولىنۋدە. دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ شارالارىنا وبلىس بيۋدجەتىنىڭ جارتىسىنان استامى باعىتتالۋدا. بيىلدىڭ وزىندە بەس جاڭا بالاباقشا اشىلىپ، التى مەكتەپ سالىندى. مەملەكەت باسشىسىنىڭ اۋىلدىق دەنساۋلىق ساقتاۋدى جاڭعىرتۋ جونىندەگى تاپسىرماسىنا سايكەس 65 مەديتسينالىق نىسان بوي كوتەردى، تاعى 27-ءسى جىل سوڭىنا دەيىن ىسكە قوسىلادى.
– ورتاق ەڭبەگىمىزدىڭ ناقتى ناتيجەسىن كورىپ وتىرمىز. ونەركاسىپ تە، اۋىل شارۋاشىلىعى دا، الەۋمەتتىك سالا دا تۇراقتى ءوسىم كورسەتۋدە. پرەزيدەنت ەلىمىزدە ەكونوميكالىق ءوسىمدى كەمىندە 7% دەڭگەيىندە قامتاماسىز ەتۋدى مىندەتتەگەن. ءبىز ءوز الدىمىزعا بۇدان دا بيىك مەجەلەردى قويىپ وتىرمىز، – دەپ اتاپ ءوتتى ەرماعانبەت بولەكپاەۆ.
دەپۋتاتتار وبلىس اكىمىنىڭ ەسەبىن قابىلداپ، جەرگىلىكتى اتقارۋشى ورگانداردىڭ جۇمىسىنا وڭ باعاسىن بەردى.
