قاراعاندىداعى قايعىلى وقيعا: اتتراكتسيوندا قازا بولعان ايەلدىڭ جاقىندارى ءمان-جايدى ءتۇسىندىردى

29713
Adyrna.kz Telegram

قاراعاندىدا "تارزانكا" ءتيپتى اتتراكتسيوندا قازا بولعان ەۆگەنيانىڭ جاقىندارى جازاتايىم وقيعا قالاي بولعانىن ايتتى. ولاردىڭ سوزىنشە، قايعىلى وقيعاعا دۇرىس بەكىتىلمەگەن ارقان سەبەپ بولدى. 33 جاستاعى قاراعاندىلىقتىڭ دوستارى ونىڭ بۇعان دەيىن مۇنداي اتتراكتسيونعا بارعانىن ايتتى، دەپ حابارلايدى "ادىرنا" ۇلتتىق پورتالى "استانا" تەلەارناسىنا سىلتەمە جاساپ.

ەۆگەنيا كوپتەن بەرى وسىلاي سەكىرگىسى كەلگەن، تۋعان كۇنىنە ەكسترەمالدى اتتراكتسيونعا سىيلىق رەتىندە سەرتيفيكات العان كەزدە قاتتى قۋانعان.

بيىكتىگى سەگىز قاباتتى بۇرىنعى "سوزۆەزديە" قوناقۇيى ءبىر كەزدەرى جوق بولىپ كەتكەن قازاقستاندىق بانكتەردىڭ بىرىنە تيەسىلى بولعان، الايدا كەيىن قاراۋسىز قالعان. سول سەبەپتى ونى روۋپدجامپەرلەر يەلەنگەن.

 

بيىكتەن ارقانمەن سەكىرۋ الپينيست ارقانىنان جاسالعان كۇردەلى امورتيزاتسيالىق جۇيەنىڭ كومەگى ارقىلى جۇزەگە اسىرىلادى. تومەندە جانە عيمارات توبەسىندە نۇسقاۋشىلار سەكىرەتىن ادامدى ساقتاندىرىپ تۇرادى. بۇل جولى دا ءدال سولاي بولعان. سەكىرەر الدىندا ايەلدەن پسيحيكالىق جانە فيزيكالىق دەنساۋلىعى تۋرالى قولحات العان. تومەندە ەۆگەنيانى كۇيەۋى كۇتىپ تۇردى، ول ايەل سەكىرگەن كەزدە ونى جاقسى كورەتىنىن ايتىپ ۇلگەردى.

- ارقان كەرىلمەي قالدى. ول ۆيدەودان دا كورىنىپ تۇر. ونى مەن دە كوردىم، ول سەكىرگەن كەزدە عانا ارقان تارتىلدى. ارقان ونىڭ ارتىنان تارتىلدى. ول بەكىتىلمەگەن، بايلانباعان، - دەيدى مارقۇمنىڭ قۇربىسى سۆەتلانا موروزوۆا.

ال سول اتتراكتسيوندى ۇيىمداستىرۋشى كومپانيا Instagram پاراقشاسىندا تولىق قاۋىپسىزدىككە كەپىلدىك بەرەدى. جەكە پاراقشاعا قاراساق، كومپانيا ون ەكى جىل بويى بيىكتەن سەكىرۋ بويىنشا قىزمەت كورسەتەدى، ءتىپتى ماكسيمالدى 245 مەتر بيىكتەن سەكىرۋدى ءساتتى ۇيىمداستىرعان. پاراقشادا ءارتۇرلى ەكسترەمالدى ۆيدەو تولىپ تۇر. الايدا ولار "سوزۆەزديە" قوناقۇيىنىڭ جانىندا نە بولعانىن تۇسىندىرمەدى. پىكىر بەرۋدەن باس تارتقانىن پوليتسياعا قولحات بەرگەنىمەن بايلانىستىردى. ال بۇل ەستريم-بيزنەستىڭ نەگىزىن قالاۋشى رەسەي ازاماتى ەكەنى بەلگىلى بولدى. ول قازىر شەتەلدە ءجۇر.

- اتالعان فاكتى بويىنشا قىلمىستىق كودەكستىڭ 306-بابىنىڭ ءۇشىنشى بولىگى ("قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەر كورسەتۋ ابايسىزدا ادام ولىمىنە اكەپ سوققان ءىس-ارەكەت") بويىنشا قىلمىستىق ءىس قوزعالدى. قىلمىستىق ءىس اياسىندا پوليتسەيلەر اتتراكتسيوندى ۇيىمداستىرۋشىنىڭ وسى قىزمەت تۇرىنە ليتسەنزياسى بار-جوعىن، قاۋىپسىزدىك تالاپتارىن ساقتاعانىن انىقتايدى. تەرگەۋ ءجۇرىپ جاتىر، - دەدى قاراعاندى وبلىسى پوليتسيا دەپارتامەنتىنىڭ ءباسپاسوز حاتشىسى باقىتجان قۇدياروۆ.

مارقۇم ەۆگەنيانىڭ تۋىستارى مەن جاقىندارى جەرلەۋگە دايىندالىپ جاتىر. ءۇش بالا اناسىز قالدى. ال ويىن-ساۋىقتى ۇيىمداستىرۋشىلارعا كوپتەگەن سۇراق قوردالانىپ قالدى: مىسالى، قىزدىڭ باسىندا نەگە شلەم بولمادى؟ سەبەبى بەتونعا باسىن سوققان كەزدە قاتتى جاراقات العان. كوپ قان جوعالتقان. قاراعاندى بيلىگى بيىكتەن سەكىرۋگە رۇقسات بەرمەگەنىن مالىمدەدى.

- قاراعاندى اكىمدىگى سەكىرۋگە رۇقسات بەرمەگەن. بيىك عيمارات يەلەرىمەن، ءوزىن-ءوزى باسقارۋ ورگاندارىمەن شاتىرلارعا قاۋىپتى قۇرىلىس پەن اتتراكتسيون ورناتۋ فاكتىلەرىنە جول بەرمەۋ بويىنشا ءتۇسىندىرۋ جۇمىسىن جۇرگىزەمىز، - دەپ ءتۇسىندىردى قالا اكىمدىگى.

سونداي-اق قالا اكىمدىگى قاي مەملەكەتتىك ورگان ويىن-ساۋىقتىڭ وسى ءتۇرىن باقىلايتىنىن ناقتى ايتا المادى. قازىر ۆەدومستۆو زاڭگەرلەرى وسى ماسەلەمەن اينالىسىپ جاتىر. ەگەر سەكىرۋدى ۇيىمداستارۋشىلاردىڭ كىناسى دالەلدەنسە، ولار سەگىز جىلعا دەيىن باس بوستاندىعىنان ايىرىلۋى مۇمكىن.

"ادىرنا" ۇلتتىق پورتالى

پىكىرلەر