قورعانىس ۆيتسە-ءمينيسترى سەرىك بورانباەۆ 19 جاستاعى سارباز دىنمۇحاممەدتىڭ قازاسىنا قاتىستى پىكىر ءبىلدىردى, دەپ حابارلايدى «ادىرنا».
قىركۇيەك ايىندا الماتى وبلىسىنداعى اسكەري بولىمدە 19 جاستاعى ساربازدىڭ ءمايىتى تابىلعان بولاتىن.
"قازىر تەرگەۋ ءجۇرىپ جاتىر، كەز كەلگەن پىكىردى دۇرىس تۇسىنبەۋى نەمەسە تەرگەۋگە كەدەرگى كەلتىرۋى مۇمكىن. بۇل – اتا-انالار ءۇشىن دە، ءبىز ءۇشىن دە وتە اۋىر قايعى. ءبىز، كومانديرلەر، ءار ساربازدى ءوز بالامىزداي قابىلدايمىز.
ءبىر جىلدىق قىزمەت بارىسىندا قول جەتكىزگەن بارلىق جاقسى ناتيجەلەردى ءبىز ولارمەن بىرگە بولىسەمىز. ال وسىنداي قايعىلى جاعدايلار ءبىز ءۇشىن دە، اسىرەسە ساربازدىڭ قاسىندا جۇرگەن كومانديرلەر ءۇشىن وتە اۋىر. قاي ءولىم بولسا دا – بۇل ورنى تولماس قازا, اتا-انا ءۇشىن اۋىر تراگەديا", – دەدى قورعانىس ۆيتسە-ءمينيسترى سەرىك بورانباەۆ.
ونىڭ ايتۋىنشا، قورعانىس مينيسترلىگى رەسمي جاۋاپ بەرمەس بۇرىن تەرگەۋدىڭ اياقتالۋىن كۇتۋدى ءجون كورەدى.
"اتا-انالار تۋرالى ايتقىم كەلەدى: ساربازدار ءارتۇرلى ۋاقىتتا جانە ءارتۇرلى ەلدى مەكەندەردەن شاقىرىلدى. بىراق بۇل تاقىرىپتى ەفيردە قايتا كوتەرگىمىز كەلمەيدى. بۇل جاقىندارى مەن تۋىستارىنا اۋىر تيەدى. تەرگەۋ اياقتالعانىن كۇتەيىك. قىلمىستىق ءىس قوزعالدى، تەرگەۋ ناتيجەسىنەن كەيىن ءبىز بارلىق سۇراقتارعا رەسمي جاۋاپ بەرەمىز", – دەپ تولىقتىردى ۆيتسە-مينيستر.
بۇعان دەيىن قازا تاپقان ساربازدىڭ اپكەسى ەڭلىك قالتاەۆا الەۋمەتتىك جەلىدە جازبا قالدىرعان. ونىڭ ايتۋىنشا، باۋىرى دىنمۇحاممەد اسكەرگە سىڭارىمەن بىرگە كەتكەن. العاشىندا ەكەۋى ءبىر اسكەري بولىمدە قىزمەت ەتكەن، بىراق كەيىن دىنمۇحاممەدتى باسقا بولىمگە – ماتىبۇلاقتاعى №01098 اسكەري بولىمگە اۋىستىرىپ، ەگىزدەردى اجىراتىپ جىبەرگەن.
"ولار بىرگە قىزمەت ەتتى، بىراق انت بەرگەننەن كەيىن دىنمۇحاممەدتى ماتىبۇلاققا، №01098 اسكەري بولىمگە اۋىستىرىپ جىبەردى. ەگىزدەردى اجىراتۋعا بولمايتىنىن بىلە تۇرا، سولاي ەتتى. قايعىلى جاعداي ءدال سول جەردە بولدى", – دەپ جازدى ەڭلىك قالتاەۆا.
ول الەۋمەتتىك جەلىدەگى پارقاشاسىنا ەگىز باۋىرلارىنىڭ قازارمادا بىرگە تۇسكەن سۋرەتىن دە جاريالاعان.
ەسكە سالايىق، 17 قىركۇيەك كۇنى مارقۇمنىڭ وتباسىنا سۋىق حابار جەتكەن بولاتىن. ول كەزدە قورعانىس مينيسترلىگى ساربازدىڭ قازا بولعانىن راستاعان جانە قىلمىستىق ءىس قوزعالعانىن حابارلاعان ەدى.
