پرەزيدەنت قاسىم-جومارت توقاەۆ «پارلامەنتتىك رەفورمالار جونىندەگى جۇمىس توبى تۋرالى» وكىمگە قول قويدى. بۇل تۋرالى بۇگىن، 8 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ 2025 جىلعى 8 قىركۇيەكتەگى «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىن ىسكە اسىرۋعا باعىتتالعان پارلامەنتتىك رەفورما بويىنشا ۇسىنىستار تۇجىرىمداۋ ماقساتىندا وسى وكىمگە قوسىمشاعا سايكەس قۇرامدا جۇمىس توبى قۇرىلسىن»،– دەلىنگەن حابارلامادا.
جۇمىس توبىنىڭ قۇرامىندا پارلامەنت ءماجىلىسى مەن سەناتىنىڭ، قازاقستان حالقى اسسامبلەياسىنىڭ وكىلدەرى، پارلامەنت ماجىلىسىندەگى ساياسي پارتيالار فراكتسيالارىنىڭ جەتەكشىلەرى بار.
بۇعان قوسا، جۇمىس توبىنا عىلىمي ينستيتۋتتاردىڭ باسشىلارى، ەلىمىزدىڭ قۇقىقتىق جۇيەسىن دامىتۋعا ەلەۋلى ۇلەس قوسقان ءارى كونستيتۋتسيالىق قۇقىق، مەملەكەت جانە قۇقىق تەورياسىنا باعدارلانعان بەلگىلى زاڭگەر-عالىمدار، سونداي-اق ۇلتتىق قۇرىلتاي مۇشەلەرى مەن ساراپشىلار ەندى.
پارلامەنتتىك رەفورما جونىندەگى جۇمىس توبىنا مەملەكەتتىك كەڭەسشى ەرلان قارين جەتەكشى بولىپ سايلاندى. ال جۇمىس توبى جەتەكشىسىنىڭ ورىنباسارى بولىپ ەرجان جيەنباەۆ پەن ارمان قىرىقباەۆ تاعايىندالدى.
جۇمىس توبىنىڭ قۇرامىندا زاڭ عىلىمدارىنىڭ دوكتورى قابدۋلساميح ايتحوجين, زاڭناما جانە قۇقىقتىق اقپارات ينستيتۋتىنىڭ ديرەكتورى ينديرا اۋباكىروۆا, ء«ادىل ءسوز» قورىنىڭ ءتورايىمى قارلىعاش جامانقۇلوۆا بار. دەپۋتاتتار اراسىنان مارات ءباشىموۆ, ەلنۇر بەيسەنباەۆ, سنەجاننا يماشەۆا جانە باسقا دا تۇلعالار ەنگەن.
جالپى جۇمىس توبىنىڭ قۇرامىندا 30 ادام بار. توپتىڭ نەگىزگى ماقساتى — پارلامەنتتىڭ جۇمىسىن جەتىلدىرۋ, سونىڭ ىشىندە تسيفرلىق ترانسفورماتسياعا باسا نازار اۋدارۋ. سونداي-اق زاڭ شىعارۋ قىزمەتىنىڭ تيىمدىلىگىن ارتتىرىپ، ونى زامان تالاپتارىنا ساي ەتۋ كوزدەلگەن.
بۇعان دەيىن مەملەكەت باسشىسى ءبىر پالاتالى پارلامەنت قۇرۋ جانە 2027 جىلى جالپىۇلتتىق رەفەرەندۋم وتكىزۋ تۋرالى باستاما كوتەرگەن ەدى.
