ءدىني كوشباسشىلار جاھاندىق بەيبىتشىلىك قوزعالىسىنىڭ مورالدىق وزەگىنە اينالا الادى. بۇل تۋرالى استانادا وتكەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXIV وتىرىسىندا ۆيتسە-پرەزيدەنت، سەز حاتشىلىعىنىڭ توراعاسى ەرلان قارين مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، 2022 جىلى وتكەن الەمدىك جانە ءداستۇرلى دىندەر ليدەرلەرىنىڭ VII سەزىندە مەملەكەت باسشىسى قاسىم-جومارت توقاەۆ جاڭا جاھاندىق بەيبىتشىلىك قوزعالىسىن قۇرۋ تۋرالى باستاما كوتەرگەن. ال VIII سەزدە بۇل يدەيانى سەزد اياسىندا جان-جاقتى تالقىلاۋدى ۇسىنعان.
«بۇل باستاما ءدىني قاۋىمداستىقتاردىڭ بىتىمگەرلىك الەۋەتىن بىرىكتىرىپ، حالىقارالىق قاتىناستارداعى رۋحاني ديپلوماتيانىڭ ءرولىن كۇشەيتۋگە باعىتتالعان»، – دەدى ەرلان قارين.
ول سونداي-اق ءدىني كوشباسشىلار زورلىق-زومبىلىقتى توقتاتۋعا جانە قاقتىعىستاردى بەيبىت جولمەن شەشۋگە ۇندەيتىن بىرىكتىرۋشى، ساياسيلانباعان ۇندەۋ جاساي الاتىنىن اتاپ ءوتتى.
قاريننىڭ سوزىنشە، VIII سەزدىڭ قورىتىندىسى بويىنشا قابىلدانعان استانا بەيبىتشىلىك دەكلاراتسياسى بەيبىتشىلىك پەن قاۋىپسىزدىك، ەكسترەميزمگە قارسى كۇرەس جانە ءدىني نىسانداردى قورعاۋ ماسەلەلەرى بويىنشا ورتاق ۇستانىمدى ايقىندايدى.
سونىمەن قاتار دەكلاراتسيادا جاستار مەن ايەلدەردىڭ قوعامداعى ءرولى، قورشاعان ورتانى قورعاۋ جانە جاڭا تەحنولوگيالاردى قولدانۋدىڭ ەتيكالىق قاعيداتتارى دا قامتىلعان.
ء«بىز سونداي-اق دەكلاراتسيانى ىلگەرىلەتۋ جانە ونىڭ ءىس جۇزىندە جۇزەگە اسىرىلۋىن قولداۋ جونىندەگى جول كارتاسىن قابىلدادىق»، – دەپ قوستى ول.
