قازاقستاندا 293 ملن تەڭگە سالىق تولەۋدەن جالتارعان ەر ادام بىرىككەن اراب امىرلىكتەرىنە قاشىپ كەتكەن. ونى باس پروكۋراتۋرا مەن قارجى مونيتورينگى اگەنتتىگىنىڭ قىزمەتكەرلەرى بىرىككەن اراب امىرلىكتەرىندەگى قازاقستان ەلشىلىگىنىڭ قولداۋىمەن ەلگە ەكستراديتسيالادى، دەپ حابارلايدى "ادىرنا".
باس پروكۋراتۋرانىڭ مالىمەتىنشە، ول وسى ءىسى ءۇشىن قازاقستاندا قىلمىستىق جاۋاپكەرشىلىككە تارتىلادى.
2018-2020 جىلدار ارالىعىندا ول كوممەرتسيالىق كاسىپورىن ديرەكتورى بولا تۇرا، كورپوراتيۆتىك تابىس جانە قوسىلعان قۇن سالىعىن تولەۋدەن جالتارىپ، مەملەكەتكە 293 ملن تەڭگەدەن استام زالال كەلتىرگەن.
قىلمىستى جاساعاننان كەيىن كۇدىكتى جاسىرىنىپ، ءبىر جىلدان استام ۋاقىت بويى حالىقارالىق ىزدەستىرىلۋدە بولدى.
وسى جىلدىڭ قىركۇيەك ايىندا ول بىرىككەن اراب امىرلىكتەرى اۋماعىندا ۇستالىپ، قازاقستان باس پروكۋراتۋراسىنىڭ سۇراۋ سالۋى بويىنشا قۇقىق قورعاۋ ورگاندارىنا بەرىلدى.
«قازىرگى ۋاقىتتا كۇدىكتى تەرگەۋ يزولياتورىنا قاماۋعا الىندى. جاسالعان قىلمىستارى ءۇشىن وعان مۇلكى تاركىلەنە وتىرىپ، بەس جىلدان سەگىز جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان. بيىل بىرىككەن اراب امىرلىكتەرىنەن 9 ىزدەستىرىلىپ جۇرگەن ادام ەكستراديتسيالاندى»، – دەلىنگەن باس پروكۋراتۋرانىڭ حابارلاماسىندا.
