ديماش قۇدايبەرگەننىڭ مەحيكوداعى كونتسەرتى انشلاگپەن ءوتتى. بۇل تۋرالى ءانشىنىڭ رەسمي پاراقشاسىندا جاريالاندى, دەپ حابارلايدى «ادىرنا».
8 قازان كۇنى ديماش قۇدايبەرگەننىڭ لاتىن امەريكاسىنداعى تۇڭعىش جەكە كونتسەرتىندە – مەحيكو قالاسىنىڭ ەڭ ايگىلى كونتسەرت زالدارىنىڭ ءبىرى "Auditorio Nacional" ساحناسىندا بىردە-ءبىر بوس ورىن بولعان جوق.
"كونتسەرت باستالماي جاتىپ-اق زالدىڭ دالىزدەرىندە تىڭدارماندار ۇلكەن توپ بولىپ مەكسيكانىڭ ۇلتتىق اندەرىن شىرقاپ، ديماشتىڭ ەسىمىن فۋتبول جانكۇيەرلەرىندەي ۇرانداتىپ، ەرەكشە اسەرلى اتموسفەرالىق كوڭىل-كۇي سىيلادى", - دەپ جازعان الەۋمەتتىك پاراقشادا.
ديماش ءان كەشىن "Golden" جانە "Smoke" اندەرىمەن باستادى. ول كورەرمەندەرگە قازاق، اعىلشىن جانە يسپان تىلدەرىندە سالەم جولدادى.
ديماشتىڭ يتاليان تىلىندە ورىنداعان "Olimpico", قىتاي تىلىندەگى "Battle of Memory", ورىس تىلىندەگى "ليۋبوۆ ۋستاۆشيح لەبەدەي", فرانتسۋزشا "SOS D’un Terrien En Détresse", يسپانشا "El Amore En Ti", اعىلشىنشا "The Story of One Sky", سونداي-اق قازاق تىلىندەگى "ماحاببات بەر ماعان" جانە "Ave Maria" ءانىن كورەرمەندەر زور ىقىلاسپەن قابىلدادى.
بۇگىن ءانشىنىڭ ەكىنشى كونتسەرتى وتەدى. كونتسەرتكە بيلەت 8 مينۋتتا ساتىلىپ كەتكەن.
ايتا كەتەيىك، بۇعان دەيىن ونىڭ نيۋ-يوركتەگى كونتسەرتى دە انشلاگپەن وتكەن ەدى.
