اتىراۋ مۇناي وڭدەۋ زاۋىتىنداعى جوندەۋ جۇمىستارىنا بايلانىستى قازاقستاندا ءبىر اپتا ىشىندە بەنزين، ديزەل جانە اۆياتسيالىق كەروسين باعاسى قىمباتتادى. بۇل تۋرالى Argus باعا اگەنتتىگى جاريالادى، دەپ حابارلايدى “ادىرنا”.
«اتىراۋ مۇناي وڭدەۋ زاۋىتىنىڭ ء(موز) جوندەۋگە توقتاتىلۋى، رەسەيلىك ءونىمنىڭ قىمباتتاۋى مەن شەكتەۋلى ۇسىنىسى سالدارىنان وتكەن اپتادا قازاقستاندىق ءموز وندىرگەن اۆياكەروسين باعاسى ءوستى. سونىمەن قاتار، قازاقستاندىق ءموز وندىرگەن بەنزين مەن ديزەل وتىنىنىڭ باعاسى دا ءبىر اپتا ىشىندە ءوستى. بۇل وسىمگە قازان ايىنا ارنالعان مۇناي ونىمدەرىنىڭ ءىرى جەتكىزۋشىلەر ۇسىنعان باعاسىنىڭ قىمباتتاۋى مەن اتىراۋ زاۋىتىنداعى جوندەۋ جۇمىستارى ىقپال ەتتى»، – دەلىنگەن Argus شولۋىنىڭ ماتىنىندە.
Argus اگەنتتىگىنىڭ مالىمەتىنشە، وتكەن اپتادا قازاقستاندىق زاۋىتتار وندىرگەن اۆياكەروسيننىڭ باعاسى تونناسىنا 474–495 مىڭ تەڭگە ارالىعىندا بولدى. ءبىر اپتا بۇرىن بۇل كورسەتكىش 444–470 مىڭ تەڭگە شاماسىندا ەدى.
«قازاقستانعا جەتكىزىلەتىن يمپورتتىق اۆياكەروسيننىڭ باعاسى وتكەن اپتادا تونناسىنا 850–890 اقش دوللارى دەڭگەيىندە باعالانسا، ءبىر اپتا بۇرىن 740–780 دوللار بولعان. قازان ايىنىڭ باسىندا رەسەيلىك اۆياتوتىقتىڭ ۇسىنىسى شەكتەۋلى بولدى»، – دەلىنگەن حابارلامادا.
اتىراۋ مۇناي وڭدەۋ زاۋىتىنداعى جوسپارلى پروفيلاكتيكالىق جوندەۋ جۇمىستارى 1 قازاندا باستالدى. مۇنايدى باستاپقى وڭدەۋ قوندىرعىسى – “ەلوۋ-ات-2” 1–25 قازان ارالىعىندا، ال “ەلوۋ-اۆت-3” 1 قازاننان 5 قاراشاعا دەيىن جوندەۋدەن وتەدى. زاۋىتتا جوندەۋ باستالعانعا دەيىن 37 مىڭ توننا بەنزين مەن 30 مىڭ توننا ديزەل وتىنى قور رەتىندە جينالعان بولاتىن.
ەلدە كوكتەمگى ەگىس جانە كۇزدەگى جيىن-تەرىن كەزىندە ءموز-دەردىڭ جوندەۋگە توقتاتىلۋى ۇيرەنشىكتى جايعا اينالىپ كەلەدى.
