قازان ايىنىڭ العاشقى اپتاسىندا سيىر ەتى باعاسى 0,4%-عا ءوستى، دەپ حابارلايدى "ادىرنا" ۇلتتىق پورتالى ساۋدا مينيسترلىگىنە سىلتەمە جاساپ.

ۆەدومستۆو باسشىسى ارمان شاققاليەۆتىڭ ايتۋىنشا، بۇل ءونىمنىڭ قىمباتتاۋى الەۋمەتتىك ماڭىزى بار تاۋارلاردىڭ جالپى باعاسىنا ەلەۋلى اسەر ەتكەن.

سونداي-اق، قاراقۇمىق 0,7%-عا، سارى ماي مەن جۇمىرتقا 0,3%-عا، ال ءسۇت پەن ىرىمشىك 0,1%-عا قىمباتتاعان.

سەگىز الەۋمەتتىك ماڭىزى بار تاۋاردىڭ باعاسى تومەندەگەن.  ەڭ كوپ ارزانداعان ونىمدەر – پياز (–2,6%), ءسابىز (–1,7%), قىرىققابات (–1%) جانە كارتوپ (–0,8%). سونداي-اق كۇنباعىس مايى مەن قانت 0,3%-عا، ال ۇن مەن كۇرىش 0,1%-عا ارزانداعان.

نان، ماكارون، تاۋىق ەتى، ايران جانە تۇز باعاسىندا وزگەرىس جوق. وسىعان بايلانىستى الەۋمەتتىك ماڭىزى بار ازىق-تۇلىكتەردىڭ جالپى يندەكسى 0% دەڭگەيىندە قالدى.

بيلىك وكىلدەرى باعا ءوسىمىن باقىلاۋدا ۇستايتىنىن جانە دەلدالدىق تىزبەكتى قىسقارتاتىنىن مالىمدەدى.

ۇلتتىق ستاتيستيكا بيۋروسىنىڭ دەرەگىنشە، بيىل قاڭتار مەن قىركۇيەك ارالىعىندا سيىر ەتى 23,6%-عا قىمباتتاعان. اۋىل شارۋاشىلىعى مينيسترلىگى باعانىڭ ءوسۋىن سۋبسيديالاردىڭ توقتاتىلۋىمەن، ەنەرگيا مەن كوممۋنالدىق قىزمەت تاريفتەرىنىڭ وسۋىمەن، جانار-جاعارماي مەن ۆەتەرينارلىق پرەپاراتتاردىڭ قىمباتتاۋىمەن جانە دەلدالداردىڭ ۇستەمە باعالارىمەن تۇسىندىرەدى.

ساۋدا مينيسترلىگى ازاماتتاردىڭ شاعىمدارىن قابىلداۋ ءۇشىن باعاعا قاتىستى جەدەل جەلى اشقانىن حابارلادى.

سوڭعى كەزدە سيىر ەتىنىڭ باعاسى تۋرالى ءجيى ايتىپ كەتكەن اۋىل شارۋاشىلىعى مينيسترلىگى وتكەن ايدا ەتتىڭ نەگىزسىز قىمباتتاۋىنا جول بەرىلمەيتىنىن ارنايى جاريالاعان بولاتىن.