مەملەكەت باسشىسى قاسىم-جومارت توقاەۆ پارلامەنتتىك رەفورما جونىندەگى جۇمىس توبىنىڭ العاشقى وتىرىسىندا كونستيتۋتسياعا وزگەرىس ەنگىزەتىنىن ايتتى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
پرەزيدەنتتىڭ ايتۋىنشا، پارلامەنتتىك رەفورما – اسا كۇردەلى ءارى جاۋاپتى جۇمىس. ول بۇل ۇدەرىستە اسىعىستىققا جول بەرۋگە بولمايتىنىن اتاپ ءوتتى.
«مەملەكەت باسشىسى رەتىندە مەن ءۇشىن پارلامەنت – ەلىمىزدەگى ساياسي جۇيەنىڭ نەگىزگى تىرەگى. سوندىقتان الدىمەن كونستيتۋتسياعا بىرقاتار وزگەرىس ەنگىزۋ قاجەت بولادى.
نەگىزگى زاڭنىڭ 40-قا جۋىق بابى وزگەرەدى. سودان سوڭ كەم دەگەندە 10 كونستيتۋتسيالىق زاڭعا جانە 50-دەن استام كودەكس پەن زاڭعا تۇزەتۋ ەنگىزۋ كەرەك بولادى. مۇنى جاڭا كونستيتۋتسيا قابىلداۋمەن تەڭ كەلەتىن ءىس دەۋگە بولادى.
ارينە، بۇل جۇمىستىڭ ءبارىن تابان استىندا، ءبىر ساتتە جۇزەگە اسىرۋ مۇمكىن ەمەس. تىڭعىلىقتى دايىندىق كەرەك.
سوندىقتان الداعى رەفورمانىڭ كەيبىر كونتسەپتۋالدى تۇستارىنا قاتىستى وي-پىكىرىمدى بىلدىرگىم كەلەدى»، – دەدى پرەزيدەنت.
مەملەكەت باسشىسى سونداي-اق الداعى رەفورما كەزەڭ-كەزەڭىمەن جۇزەگە اساتىنىن جانە ونىڭ ەلدىڭ ساياسي جۇيەسىن جاڭعىرتۋدىڭ قيسىندى جالعاسى بولاتىنىن ايتتى.
«بىرىنشىدەن، ءبىز بارلىق رەفورمانى تەك ەۆوليۋتسيالىق جولمەن جۇرگىزەمىز. ياعني ازاماتتاردىڭ سۇرانىسى، ءتول ەرەكشەلىگىمىز بەن ەلىمىزدىڭ تۇپكى مۇددەسى ەسكەرىلەدى.
پارلامەنتتىك رەفورما كەزەڭ-كەزەڭىمەن ىسكە اسىرىلىپ كەلە جاتقان اۋقىمدى ساياسي جاڭعىرۋدىڭ قيسىنىنا ساي كەلەدى.
ەستەرىڭىزدە بولسا، ساياسي رەفورمالاردىڭ ءتورت پاكەتى اياسىندا پارلامەنتتىك وپپوزيتسيا تۋرالى نورما بەكىتىلگەن ەدى. وندا وكىلدەرى از پارتياعا ءماجىلىستىڭ تۇراقتى كوميتەتتەرىنىڭ بىرىندە توراعالىق لاۋازىم اتقارۋ جانە پارلامەنتتىك تىڭداۋ وتكىزۋ تۋرالى باستاما كوتەرۋ قۇقىعىنا كەپىلدىك بەرىلدى.
بۇدان بولەك، پارتيالار پارلامەنتكە ءوتۋى ءۇشىن سايلاۋدىڭ تومەنگى شەگى ازايتىلدى. سودان سوڭ 2022 جىلى جۇرگىزىلگەن كونستيتۋتسيالىق رەفورمانىڭ ارقاسىندا ءبىز ءماجىلىستىڭ قۇزىرەتىن ەلەۋلى تۇردە كەڭەيتتىك. ناقتى ايتقاندا، بۇگىندە ءماجىلىس زاڭ قابىلدايدى، ال سەنات ماقۇلدايدى.
بۇل العاشقى قادامدار ەدى. ەندى سوڭعى جىلدارى قوعامداعى ساياسي مادەنيەتتىڭ ەداۋىر وسكەنىن ەسكەرە وتىرىپ، ءبىز بىرتە-بىرتە جانە بايىپتى جولمەن ءبىر پالاتالى پارلامەنتكە ءوتۋدى باستايمىز»، - دەدى مەملەكەت باسشىسى.
بۇعان دەيىن قازاقستاندا پارلامەنتتىك رەفورما جونىندەگى جۇمىس توبى قۇرىلعان بولاتىن. توپتى مەملەكەتتىك كەڭەسشى ەرلان قارين باسقارادى. ونىڭ قۇرامىنا پرەزيدەنت اكىمشىلىگىنىڭ وكىلدەرى، مينيسترلەر، ءماجىلىس پەن سەنات دەپۋتاتتارى، ساياسي پارتيالار فراكتسيالارىنىڭ جەتەكشىلەرى، سونداي-اق زاڭگەر عالىمدار مەن ساراپشىلار كىردى.
ەسكە سالايىق، قاسىم-جومارت توقاەۆ 8 قىركۇيەكتەگى حالىققا جولداۋىندا قازاقستاندا ءبىر پالاتالى پارلامەنت قۇرۋ مۇمكىندىگىن اتاپ وتكەن ەدى. ونىڭ ايتۋىنشا، ساياسي رەفورمالار قوعامنىڭ ناقتى سۇرانىسىنا ساي كەزەڭ-كەزەڭىمەن جۇزەگە اسىرىلادى.
