قاراعاندى قالاسىندا Threads-كە جازبا جاريالايمىن دەپ باسى داۋعا قالعان اليكا مۇحاماديەۆا ءىسى بويىنشا سوت پروتسەسى باستالدى، دەپ حابارلايدى "ادىرنا" ۇلتتىق پورتالى.
تەرگەۋ دەرەگىنشە، ايىپتالۋشى ءوز كىناسىن تولىق مويىنداعان.
قورعاۋشىلارىنىڭ ايتۋىنشا، مۇحاماديەۆانىڭ ەكى جاسار بالاسى بار. وسىعان بايلانىستى ولار سوتتان جازا ءتۇرىن جەڭىلدەتۋدى سۇراعان. الايدا، جەڭىلدەتىلگەن جاعدايدا دا ايىپتالۋشى 4,5 جىلعا دەيىن باس بوستاندىعىنان ايىرىلۋى مۇمكىن. سوڭعى شەشىمدى سوت شىعارادى.
قازىر تاراپتار ايىپپۇل تولەۋ ارقىلى جازانى الماستىرۋ نۇسقاسىن قاراستىرۋدا. بىراق بۇل جاعدايدا تولەنەتىن سوما از ەمەس — 12 ميلليون تەڭگە.
قوعامدا ۇلكەن رەزونانس تۋدىرعان ءىستىڭ كەلەسى سوت وتىرىسى 18 قازان كۇنى وتەدى.
ەسكە سالايىق، 2025 جىلدىڭ جازىندا اليكا مۇحاماديەۆا Threads الەۋمەتتىك جەلىسىندەگى جازبالارى ارقىلى قازاقستاندىقتاردىڭ اشۋ-ىزاسىن تۋدىرعان. كەيىن وعان قاتىستى تەرگەۋ باستالىپ، شىلدە ايىندا ول قاماۋعا الىنعان بولاتىن.
ايىپتالۋشى بۇعان دەيىن ءوز سوزدەرىنىڭ كونتەكستەن جۇلىنىپ الىنعانىن ايتىپ، كەشىرىم سۇراعان. ول ەشكىمنىڭ سەزىمىنە تيۋ نيەتى بولماعانىن مالىمدەگەن.
قازان ايىندا تەرگەۋ اياقتالىپ، ءىس سوتقا جولداندى.
