14 قازان كۇنى بەلگىلى ءانشى ديماش قۇدايبەرگەن Almaty Open تۋرنيرىندە ونەر كورسەتىپ، فرانتسيا، اقش، تۇركيا جانە قازاقستان اۆتورلارىنىڭ اندەرىن ورىندادى. سونداي-اق ول كومپوزيتور رەتىندە ءوزىنىڭ «سامعاۋ» اتتى جاڭا تۋىندىسىن تانىستىردى، دەپ حابارلايدى «ادىرنا» ءتىلشىسى dimashnews.com-عا سىلتەمە جاساپ.
ءانشىنىڭ قازاق تىلىندەگى حالىققا تارتۋ ەتكەن «سامعاۋ» اتتى تۋىندىسى – اسپانعا سامعاعان قىراننىڭ ءوز حالقى مەن جالپى الەمگە دەگەن شەكسىز ماحابباتىن بەينەلەيتىن سيمۆولدىق ارناۋ. ءان العاش رەت 5 قازاندا Madison Square Garden ساحناسىندا وتكەن ديماشتىڭ جەكە كونتسەرتىندە شىرقالىپ، كەيىن مەكسيكاداعى “Stranger” شوۋىندا ەكى رەت ورىندالعان بولاتىن.
«بۇل جارىس ءوز ەلىمىزدە ءوتىپ جاتقاندىقتان جانە وعان ءبىزدىڭ سپورتشىلار قاتىسىپ، قازاقستاننىڭ بەدەلىن كوتەرىپ جۇرگەندىكتەن، مۇمكىندىگىنشە قاراپ، قولداۋ كورسەتۋگە تىرىسامىن. ارينە، ءوزىمدى اسا قىزۋ جانكۇيەرمىن دەپ ايتا المايمىن، بىراق ۇنەمى بولماسا دا، تەننيستى تاماشالاۋعا ۋاقىت تابامىن»، – دەدى ديماش.
سونداي-اق ول قازاقستان تۋىن كوتەرگەن بارلىق سپورتشىعا ىستىق ىقىلاسپەن جانكۇيەر بولاتىنىن اتاپ ءوتتى.
ايتا كەتەيىك، Almaty Open ATP 250 – حالىقارالىق دەڭگەيدەگى ءىرى تەننيس تۋرنيرلەرىنىڭ ءبىرى عانا ەمەس، سونىمەن قاتار ايگىلى ارتىستەر قاتىساتىن ەرەكشە مادەني شارا.
بۇعان دەيىن ديماش قۇدايبەرگەننىڭ مەحيكوداعى كونتسەرتى انشلاگپەن وتكەنى ايتىلعان ەدى. ەندى ءانشى ەۋروپانىڭ بىرنەشە ەلىندە كونتسەرت بەرەدى.
