لوندونداعى OVO Arena Wembley ساحناسىندا وتەتىن جەكە كونتسەرتى الدىندا قازاقستاندىق تانىمال ءانشى سۇحبات بەردى، دەپ حابارلايدى “ادىرنا” ۇلتتىق پورتالى.
كومپوزيتور جانە مۋلتينسترۋمەنتاليست ديماش قۇدايبەرگەن ۇلىبريتانيانىڭ مادەني جۋرنالى «The Upcoming» باسىلىمىنا سۇحبات بەردى.
ديماش ءوزىنىڭ شىعارماشىلىق جولى، «Stranger» اتتى الەمدىك تۋرى، مۋزىكا ارقىلى شىعىس پەن باتىستى توعىستىرۋ فيلوسوفياسى مەن ونەردەگى باستى ۇستانىمدارى تۋرالى اڭگىمەلەدى.
ءانشى Wembley ارەناسىندا ونەر كورسەتۋدىڭ ءوزى ءۇشىن ەرەكشە ماڭىزعا يە ەكەنىن اتاپ ءوتتى.
«بۇل مەنىڭ لوندوندا العاشقى جەكە كونتسەرتىم ەمەس، بىراق بۇل كەزەڭنىڭ ءمانى ەرەكشە. 2018 جىلى 23 جاسىمدا 3000 ادامدىق كونتسەرت بەرۋ مەن ءۇشىن ۇلكەن جاۋاپكەرشىلىك بولدى. قازىر ساحنا دا، كورەرمەن دە كەڭەيدى. بىراق ساحناعا شىعار الدىنداعى تولقۋ ەشقاشان ازايعان ەمەس»، – دەدى ول.
ونەر يەسى ءوز شىعارماشىلىعىن بەلگىلى ءبىر جانرمەن شەكتەمەيتىنىن جانە ءتۇرلى مۋزىكالىق باعىتتاردى بىرىكتىرۋ ونىڭ تابيعي تالپىنىسى ەكەنىن ايتتى.
«مەن ەشقانداي ەرەجەگە بايلانبايمىن. كەيدە ۇيلەسپەيتىن ەلەمەنتتەردى بىرىكتىرىپ، جاڭا فورما جاساۋعا تىرىسامىن»، – دەدى ديماش.
لوندوندا جەتى جىلدان كەيىن وتەتىن كونتسەرتىن «Stranger» دەپ اتاۋىن دا كەزدەيسوق ەمەستىگىن اتاپ ءوتتى. بۇل ءسوز ءانشىنىڭ جاڭا الەمدەرگە، جاڭا تىڭدارمانعا جول تارتقان ىزدەنۋشى رەتىندەگى بەينەسىن سيپاتتايدى.
سونىمەن قاتار ءانشى ديماش قازاقتىڭ ۇلتتىق مادەنيەتىن حالىقارالىق ساحنادا ناسيحاتتاۋدىڭ ماڭىزدىلىعىن اتاپ ءوتتى.
"مۋزىكا – حالىقتىڭ مادەني كودى. ول ارقىلى ءبىز ءوز ۇلتىمىزدىڭ رۋحى مەن دۇنيەتانىمىن الەمگە كورسەتە الامىز", - دەدى ءانشى.
