قازاقستاندىق تانىمال ءانشى ديماش قۇدايبەرگەننىڭ تۋعان كۇنىنە وراي ونىڭ برازيليالىق فان-كلۋبى «Dimash on the Road» جوباسىن جالعاستىردى، دەپ حابارلايدى "ادىرنا" ۇلتتىق پورتالى Dimashnews-كە سىلتەپ.
جوبا اياسىندا ەكىنشى جىل قاتارىنان برازيليانىڭ ءىرى قالاسى فورتالەزاداعى قوعامدىق كولىك – قالالىق اۆتوبۋس تولىعىمەن ديماشتىڭ بەينەسىمەن بەزەندىرىلدى. ەندى بۇل اۆتوبۋس قالا كوشەلەرىندە ءجۇرىپ، جولاۋشىلارعا ەرەكشە اسەر سىيلاپ ءجۇر.
فورتالەزا – 2,7 ميلليونعا جۋىق تۇرعىنى بار، 300 جىلدىق تاريحى بار قالا. ول جاعاجايلارىمەن، جىلى كليماتىمەن جانە مادەني ومىرىمەن تانىمال. قازىر وسى قالا كوشەلەرىندە «الەمدەگى ەڭ ەرەكشە داۋىس!» دەگەن جازۋى بار، ديماشتىڭ سۋرەتى بەينەلەنگەن اۆتوبۋستار جۇرۋدە.
اۆتوبۋستىڭ سىرتىندا ءانشىنىڭ فوتوسى مەن ۇرانى، 2021 جىلعى Digital Show كەزىندە ورىندالعان «Sos d’un terrien en détresse» انىنە ارنالعان QR-كود پەن 2024 جىلعا جوسپارلانعان بارسەلونا، بەرلين، لوندون قالالارىنداعى كونتسەرتتەر ءتىزىمى ورنالاسقان.
ايتا كەتەيىك، بۇعان دەيىن ديماش قۇدايبەرگەن «تاۋ ىشىندە» اتتى جاڭا انىنە ارناپ چەللەندج جاريالاعان ەدى.
