اكتەر بولۋ – تەك جاتتالعان ءماتىندى ايتۋ عانا ەمەس، بۇل – تەرەڭ ەموتسيانى جەتكىزە ءبىلۋ، كەيىپكەردىڭ ىشكى جان دۇنيەسىن كورسەتۋ، كورەرمەنگە سەندىرە ءبىلۋ ونەرى. وسى قاسيەتتى استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ دارىندى اكتەرى سالامات مۇقاشەۆ جاقسى تۇسىنەتىنىن، ونىڭ رولدەرى، اكتەرلىك شەبەرلىكتەرى ارقىلى بايقايمىز. كەلگەن كورەرمەن سالاماتتىڭ ويىنىنا ءتانتى بولاتىنى ءسوزسىز. سان قىرلى اكتەردىڭ ونەردەگى قادامى، جولى تەاتر ءسۇيەر قاۋىمدى ءاردايىم قىزىقتىرادى.
سالامات مۇقاشەۆ-كوللەدجدى تامامداعانان كەيىن ت.جۇرگەنوۆ اتىنداعى قازاق ۇلتتىق ونەر اكادەمياسىنا «مۋزىكالىق تەاتر اكتەرى» ماماندىعىنا وقۋعا تۇسەدى. ستۋدەنتتىك شاعىندا جاڭاشىل رەجيسسەر بولات اتاباەۆ سالاماتتىڭ ءان سالعانىنا ريزا بولاتىن. اكادەميانى تامامداعانان كەيىن ءبىر توپ «جۇرگەنوۆ تۇلەكتەرىمەن» اقتوبە قالاسىنا جول تارتىپ، سونداعى ت.احتانوۆ اتىنداعى وبلىستىق قازاق دراما تەاترىنا اكتەر بولىپ قابىلدانادى. اقتوبە ولكەسىندەگى تۇڭعىش ءرولى م.بادجيەۆتىڭ «ماحاببات جاعالاۋى» دراماسىنداعى-ءازيز بولاتىن.
سالامات-ت.احتانوۆ تەاترىندا بىرنەشە بەينەلەردى نۇسقالايدى. كوپتەگەن وبلىستىق شارالاردى جۇرگىزەدى. 2016 جىلى اقتوبە قالاسىندا «بالاۋسا» حالىقارالىق تەاترلار فەستيۆالى وتەدى. ونەر دوداسىنىڭ جۇرگىزۋشىسى سالامات مۇقاشەۆ بولادى. ال قازىلار القاسىنىڭ توراعاسى رەتىندە قر ەڭبەك سىڭىرگەن قايراتكەرى، ونەردەگى اكەسى اسحات ماكسيمۇلى ماەميروۆ كەلدى. ۇلاعاتتى ۇستازدىڭ بۇل ساپارى شاكىرت سالامات ءۇشىن بەرەكەلى اتانىپ، اسحات ماكسيمۇلى سالاماتتى استانا قالاسىنا جاڭادان اشىلعالى جاتقان «Astana Musical» تەاترىنا نەگىزىن قالاسۋعا شاقىرادى. سالامات تاۋەكەلگە بەل بۋىپ، استانا قالاسىنا جاس تەاتردىڭ شاڭىراعىن كوتەرىسۋگە كەلەدى. سالاماتتىڭ «Astana Musical» تەاترىننىڭ العاشقى قويىلىمىنان-اق، جۇلدىزى جاندى.
ءا.باعداتتىڭ «دوستار سەرتى» ميۋزيكلىندە باستى كەيىپكەر جۇماتايدى بەينەلەيدى. جۇماتاي-ونەردى جانى سۇيەتىن، اۋىلدان كەلگەن قاراپايىم بالا. جۇماتاي اسەمگە عاشىق. ونى شىن ءسۇيىپ قالدى. اسەمگە سەزىمىنىڭ بىلدىرگىسى كەلەدى. بىراق، اۋىل بالاسى بولعاندىقتان، بويىندا ازداپ ۇياڭدىق بار. بىلدىرۋگە ارەكەت ەتكەندە جان دوسى اسەم ەكەۋىنىڭ ۇيلەنەتىنىن ايتادى. ارينە، جۇماتاي-سالامات العاشقىدا قىزعانىش سەزىمىن ويىنى ارقىلى بايقاتادى. بىراق، ءوزى ورىنداعان «توي جىرى» انىندە ماحابباتتان دوستىقتى بيىك قويعان جۇماتايدى كورەمىز. سالامات كەيىپكەرىن وسىنداي مىنەز-قۇلىقتا كەيىپتەيدءى.
سالامات مۇقاشەۆ 2017 جىلى «ساحناگەر» ۇلتتىق تەاتر سىيلىعىنىڭ ء«ۇمىت» نوميناتسياسىنىڭ يەگەرى.
سالاماتتىڭ وڭ جامباسىنا كەلگەن, تەك قانا قازاق حالقىن عانا ەمەس، فرانتسۋز كورەرمەن تاڭقالدىرعان ج.پرەسگيۋۆنيكتىڭ «رومەو-دجۋلەتتا» ميۋزيكلىندەگى رومەو ەكەنىن كورگەن كوز جۇرتشىلىق جاقسى بىلەدى. اكتەر سالامات نۇسقالاۋىنداعى رومەو-جۇرەگى اپپاق پاراقتاي تازا، جانارىندا ەش ارامدىعى جوق كەيىپكەر.
وسى ارقىلى سالامات ماحابباتتىڭ تازالىعىن، شىن عاشىق ادامنىڭ بولمىسىن تانىتا ءبىلدى. قازاق تەاترىندا رومەو بەينەسىن ميۋزيكل جانرىندا تۇڭعىش نۇسقالاعان سالامات مۇقاشەۆ بولدى. ەلوردالىق ونەر سۇيەر قاۋىمنىڭ ء ا.باعداتتىڭ «ەر توستىك» ميۋزيكلى ەسىڭدە بولار، اتالعان تۋىندى دا، سالامات باستى كەيىپكەر باتىر ەر توستىكتى وينادى.
«Astana Musical» تەاترىمەن سالامات پاريج، كاننى، بروسسەل، ۆەنا قالالارىندا ونەر كورسەتىپ، قازاق ەلىنىڭ ابىرويىن اسقاقتاتتى. سالامات مۇقاشەۆ بۇگىنگى تاڭدا استانا مۋزىكالىق جاس كورەرمەندەر تەاترىنىڭ بەلدى اكتەرى، نەگىزىن سالۋشىلاردىڭ ءبىرى.
سالاماتتىڭ ءار كەيىپكەرى وزىنشە ەرەكشە. اتاپ ايتار بولساق، م.اۋەزوۆ پەن م.ءابىلدىڭ «اباي-توعجان» دراماسىنداعى ەربول-اقىننىڭ سەرىگى, ابايدىڭ كەڭەسشىسى، قولداۋشىسى. ابايدىڭ باقىتتى بولۋىنا تىلەكشى، تىلەۋلەس جاننىڭ ءبىرى. سالامات وسىنى ۇعىندىرادى. ع.مۇسىرەپوۆتىڭ «قىز-جىبەك» ەتنو-فولكلورلىق ميۋزيكلىندەگى تولەگەن-ليريكالىق، عاشىعىن شىن سۇيگەن كىرشىكسىز كەيىپكەر. ال سالاماتتىڭ اكتەرلىك شەبەرلىگىنىڭ ەكىنشى قىرىن اشاتىن ءشامشى بولسا، حالقىڭ سۇيگەن، حالقى سۇيگەن كومپوزيتور رەتىندە كورىنەدى. ە.امانشاەۆتىڭ «شاكىرىم» دراماسىنداعى قاراسارتوۆ سالاماتتىڭ اكتەرلىك دەڭگەيىنىڭ شىڭى بولدى. بيلىك قۇربانى بولعان، جوعارى باسشىلاردىڭ تاپسىرماسىن ورىندايمىن دەپ شاكارىمدى قۇربان ەتكەن، ابزال قاراسارتوۆ ءومىر بويى ەل الدىندا اقتالۋمەن وتكەن كەيىپكەر. ونىڭ ويىندا، ساناسىندا ءوزىن كىنالى سەزىنگەن ۇلكەن تاڭبا تۇردى. سالامات-قاراسارتوۆ جۇرەگىندە ادۆوكات پەن پروكۋرور قاتار جاتىپ، جان-جاعىنان ار-ۇياتى قىسقان ادام. سالامات اتالمىش وبرازىن وسىلاي اقتاپ الادى.
اتالعان كەيىپكەرلەردەن بولەك تەاتر رەپەرتۋارىندا: د.يسابەكوۆتىڭ «گاۋھارتاس» مۋزىكالىق دراماسىندا اسكەربەك، م.وماروۆانىڭ «شانەل 5» دەرەكتى دراماسىندا تەمىربەك جۇرگەنوۆ رولدەرىن سومداۋدا. «اباي» تەلەارناسىندا «جادىگەر» باعدارلاماسىن جۇرگىزىپ، ۇلتىمىزدىڭ اسىل مۇرالارىن حالىققا كەڭىنەن تانىتتى. كسرو حالىق ءارتيسى س.مايقانوۆا: «ىشتەن تانىپ، ىشتەن ءبىلىپ، تىنىپ كورمەگەن اكتەردى، اكتەر دەپ تابۋ نەعايبىل» دەيدى. شىنىمەن دە، سالامات ساحنادا ىشكى جان-دۇنيەگە، ىشكى بولمىسقا ءمان بەرەتىن اكتەر. سالاماتتىڭ ويىنىندا سىرتقى كەلبەت پەن ىشكى وي استاسىپ جاتادى. بۇل ناعىز اكتەر ءۇشىن ماڭىزدى قۇبىلىس. سالماقتى بولمىسىمەن، ۇتىمدى رولدەرىمەن كورەرمەندەر جۇرەگىنە جول تاپقان سالاماتتىڭ ەلىنە بەرەرى ءالى الدا!
باحتيار تۇرسىن
تەاترتانۋشى
