اقمولا وبلىسى ءبىرجان سال اۋدانىنىڭ ۇلگى اۋىلىندا ورتكە ورانعان ءۇيدىڭ ىشىنەن بەس بىردەي كامەلەتكە تولماعان بالانى اۋىل تۇرعىنى ەرلان توقسانباەۆ امان الىپ شىقتى، دەپ حابارلايدى "ادىرنا" ۇلتتىق پورتالى "ارقا اجارى" گازەتىنە سىلتەمە جاساپ.
ەرلاننىڭ ايتۋىنشا، ول سول كۇنى ۇلى ميراس ەكەۋى شارۋاشىلىق جەرىن جيناستىرىپ جۇرگەن. كەنەت كورشى ۇيلەردىڭ بىرىنەن ءتۇتىن شىققانىن بايقاپ، بىردەن سول جاققا قاراي جۇگىرگەن. ءۇيدىڭ شاتىرى مەن قابىرعالارى وتقا ورانعان كەزدە، تەرەزەنىڭ ار جاعىندا قويۋ تۇتىنگە تۇنشىعىپ، جىلاپ تۇرعان بالالاردى كورىپ، تاۋەكەلگە بەل بۋعان. ول تەرەزەنى سىندىرىپ، ىشكە كىرىپ، بالالاردى ءبىر-بىرلەپ سىرتقا الىپ شىققان.
بالالاردىڭ ۇلكەنى 13-14 جاستا، ال ەڭ كىشىسى بالاباقشا جاسىندا ەكەنى ايتىلدى.
كورشىلەردىڭ ايتۋىنشا، ءورت كەزىندە بالالاردىڭ اتا-اناسى جۇمىستا بولعان. انالارى اۋىلدان 8-9 شاقىرىم جەردەگى دەمالىس ورنىندا ەڭبەك ەتسە، اكەسى ءىسساپاردا جۇرگەن. بالالارعا مەديتسينالىق جانە پسيحولوگيالىق كومەك كورسەتىلىپ، ولار قازىر انالارىنىڭ جۇمىس ورنىنان بەرىلگەن بولمەدە ۋاقىتشا تۇرىپ جاتىر.
