قازاقستان رەسپۋبليكاسى مادەنيەت جانە اقپارات مينيسترلىگى قوعام مەن مەملەكەت اراسىنداعى ءوزارا سەنىمدى نىعايتىپ، شىنايى قوعامدىق ديالوگ ورناتۋعا باعىتتالعان كەشەندى جانە جۇيەلى ستراتەگيانى ىسكە اسىرۋدا.
مەملەكەت باسشىسى XII ازاماتتىق فورۋم قاتىسۋشىلارىنا جولداعان ۇندەۋىندە ازاماتتىق قوعامدى دامىتۋعا مەملەكەتتىڭ ايرىقشا ءمان بەرەتىنىن اتاپ ءوتتى.
«مەملەكەت پەن ازاماتتاردىڭ قارىم-قاتىناسىنا ارقاۋ بولعان «حالىق ۇنىنە قۇلاق اساتىن مەملەكەت» تۇجىرىمداماسى بەرىك ورنىعا ءتۇستى. ءوزارا سىيلاستىق پەن تۇسىنىستىك، جاناشىرلىق پەن جاۋاپكەرشىلىك قاسيەتتەرى كەڭىنەن دارىپتەلىپ، قوعامنىڭ قۇقىقتىق مادەنيەتىن ارتتىرۋ ءۇشىن ناقتىشارالار اتقارىلدى»، – دەدى قاسىم-جومارت توقاەۆ.
پرەزيدەنت بەلسەندى ازاماتتىق قوعام قالىپتاستىرۋ ءۇشىن ۇكىمەتتىك ەمەس ۇيىمداردىڭ بەدەلىن ارتتىرۋ ماڭىزدى ەكەنىن بىرنەشە رەت اتاپ وتكەن بولاتىن.
وسى ماقساتتا 2021-2024 جىلدار ارالىعىندا قر مادەنيەت جانە اقپارات مينيسترلىگىنىڭ باستاماسىمەن قۇقىقتىق كەڭىستىكتى ساپالىق تۇرعىدان جاڭعىرتۋ ۇدەرىسى باستالدى. بۇل باعىتتا بىرقاتار نەگىزگى زاڭنامالىق اكتىلەر قابىلداندى. اتاپ ايتقاندا، «قوعامدىق باقىلاۋ تۋرالى» زاڭ، سونداي-اق «مەملەكەتتىك الەۋمەتتىك تاپسىرىس، ۇكىمەتتىك ەمەس ۇيىمدارعا ارنالعان گرانتتار جانە سىيلىقاقىلار تۋرالى» زاڭعا تۇزەتۋلەر پاكەتى قابىلداندى. سونىمەن قاتار «ۆولونتەرلىك قىزمەت تۋرالى»، «قايىرىمدىلىق تۋرالى»، «قوعامدىق بىرلەستىكتەر تۋرالى»، «مەدياتسيا تۋرالى» جانە «قوعامدىق كەڭەستەر تۋرالى» زاڭدارعا تولىقتىرۋلار ەنگىزىلدى.
اتالعان زاڭداردى ءتيىمدى ىسكە اسىرۋ ماقساتىندا 14 نورماتيۆتىك قۇقىقتىق اكتىگە وزگەرىستەر ەنگىزىلدى.
قوعامدىق كەڭەستەردىڭ ءرولى ايتارلىقتاي كۇشەيدى. سوڭعى ءۇش جىلدا ازاماتتىق قوعام وكىلدەرىنىڭ ۇلەسى 23%-عا ءوسىپ، 264 قوعامدىق كەڭەستىڭ قۇرامىنداعى ولاردىڭ قاتىسۋ دەڭگەيى 86%-عا جەتتى. جاستاردىڭ ۇلەسى دە 5%-عا ارتىپ، 15%-دى قۇرادى.
العاش رەت كۆازيمەملەكەتتىك سەكتوردا ازاماتتارمەن تىكەلەي كەرى بايلانىس ورناتۋعا مۇمكىندىك بەرەتىن 13 جاڭا قوعامدىق كەڭەس قۇرىلىپ، ءوز جۇمىسىن باستادى.
گرانت ساياساتى مەن مەملەكەتتىك الەۋمەتتىك تاپسىرىس جۇيەسى رەفورمالاندى. جوبالاردى ىرىكتەۋدىڭ كوپ دەڭگەيلى مەحانيزمى ەنگىزىلىپ، ساراپتاما مەن ەسەپ بەرۋ راسىمدەرى جەتىلدىرىلدى.
اتالعان وزگەرىستەر الەۋمەتتىك جوبالاردى قارجىلاندىرۋ كولەمىن ەكى ەسە ارتتىرۋعا، مەملەكەتتىك الەۋمەتتىك تاپسىرىستىڭ قامتۋ اياسىن 21 باعىتقا دەيىن كەڭەيتۋگە جانە جۇزەگە اسىرىلاتىن جوبالار سانىن 22%-عا كوبەيتۋگە مۇمكىندىك بەردى.
سوڭعى بەس جىل ىشىندە جالپى سوماسى 10,3 ملرد تەڭگەنى قۇرايتىن 556 گرانت جۇزەگە اسىرىلدى. 2025 جىلى جالپى قۇنى 1,8 ملرد تەڭگە بولاتىن 104 گرانت ىسكە اسىرىلۋدا. ۇەۇ-عا ارنالعان سىيلىقاقى كونكۋرسى رەكوردتىق ناتيجەگە قول جەتكىزىپ، وتىنىشتەردىڭ سانى 135-تەن 208-گە دەيىن ارتتى. ال، جەڭىمپاز ۇيىمدار سانى 73-كە جەتتى. ولاردىڭ قاتارىندا اۋىلدىق ايماقتارداعى باستامالار مەن ينكليۋزيۆتى جوبالار دا بار. وسى كەزەڭدە بارلىعى 336 ۇكىمەتتىك ەمەس ۇيىم مەملەكەتتىك سىيلىقاقىمەن ماراپاتتالدى.
بۇل ناتيجەلەر مەملەكەت پەن ازاماتتىق سەكتور اراسىنداعى سەرىكتەستىكتىڭ جاڭا، جەتىلگەن كەزەڭىنە جول اشتى.
ازاماتتىق قوعامدى دامىتۋدىڭ باسىم باعىتتارىنىڭ ءبىرى رەتىندە ۆولونتەرلىك قوزعالىستى قولداۋ جانە نىعايتۋجۇمىستارى بەلسەندى جۇرگىزىلۋدە. 2021-2023 جانە 2024-2026 جىلدارعا ارنالعان ەكى جول كارتاسى قابىلدانىپ، ولار ءتورت ستراتەگيالىق باعىتپەن 85 ناقتى ءىس-شارانى قامتىدى.
رەسپۋبليكالىق فرونت-وفيس پەن مىڭداعان بەلسەندى جاستى بىرىكتىرگەن 20 وڭىرلىك ۆولونتەرلىك ورتالىق قۇرىلدى. وسى ۋاقىت ىشىندە 275 ۆولونتەرلىك جوبا مەن 1 200-دەن استام ۆولونتەرلىك باستاما جۇزەگە اسىرىلدى.
قازاقستان ۆولونتەرلىك قىزمەت سالاسىندا حالىقارالىق ۇيىمدارمەن تىعىز ىنتىماقتاستىق ورناتىپ كەلەدى. سوڭعى جىلدارى ەلىمىزدەن 21 ۆولونتەر بۇۇ قۇرىلىمدارى اياسىندا يوردانيا، كەنيا، تايلاند جانە تۇركيا ەلدەرىندە قىزمەت اتقاردى. 2025 جىلى ولاردىڭ جەتەۋى ءوز قىزمەتىن جالعاستىرۋدا. سونىمەن قاتار، بيىل «يگى ىستەر مارافونى» اياسىندا ەل بويىنشا 27 مىڭنان استام يگى ءىس اتقارىلدى.
