بۇعان دەيىن قىتايدا پرانك جاساپ باسى داۋعا قالعان بلوگەر ارۋجان ايبەكوۆاعانىڭ ۇستىنەن اكىمشىلىك ءىس قوزعالدى. ول كەزەكتى پرانكى ءۇشىن تاعى دا پوليتسيا بولىمشەسىنە جەتكىزىلدى. بۇل تۋرالى الماتى قالاسىنىڭ پوليتسيا دەپارتامەنتى مالىمدەدى، دەپ حابارلايدى “ادىرنا”.
پوليتسيا قىتاي مەن وزبەكستاندە ادەپسىز پرانك جاساعان بلوگەر قىزعا قاتىستى تەكسەرۋ جۇرگىزىپ، وعان ۇساق بۇزاقىلىق فاكتىسى بويىنشا ءىستى سوتقا جولدادى.
«اتالعان ازاماتشا بۇعان دەيىن دە وسىنداي ارەكەتتەرگە جول بەرگەن، سول كەزدە ونىمەن پروفيلاكتيكالىق اڭگىمە جۇرگىزىلگەن بولاتىن. الايدا، ول ءتيىستى قورىتىندى شىعارماعانى بايقالادى. مۇنداي قىلىقتار قوعامدىق مورالعا قۇرمەتسىزدىك تانىتادى جانە ءىس-ارەكەتتىڭ بەلگىلەنگەن نورمالارىن بۇزادى»، - دەلىنگەن حابارلامادا.
پوليتسيا، قوعامدىق ورىندارداعى ادەپسىز، ارانداتۋشىلىق نەمەسە ادامنىڭ ار-نامىسىن قورلايتىن كەز كەلگەن ءىس-ارەكەتكە جول بەرىلمەيتىنىن جانە زاڭ اياسىندا جاۋاپكەرشىلىك قاراستىرىلاتىنىن ەسكە سالدى.
ايتا كەتەيىك، بۇعان دەيىن سول بلوگەر قىتايدا دا ۇقساس پرانك جاساپ، قوعامدا قىزۋ تالقى تۋدىرعان بولاتىن. سول كەزدە قۇقىق قورعاۋ ورگاندارى ونىمەن پروفيلاكتيكالىق جۇمىس جۇرگىزگەن ەدى.
ءتىپتى كەشىرىم سۇراعان ۆيدەوسىن جاريالاعان. بىراق ءتيىستى قورىتىندى شىعارماعان ىسپەتتى.
