قازاقستاننىڭ ەڭبەك سىڭىرگەن ءارتىسى، «قۇرمەت» وردەنىنىڭ يەگەرى مەرۋەرت قاراتايقىزى وتەكەشوۆا قازاقستاننىڭ حالىق ءارتىسى اتاعىن الدى، دەپ حابارلايدى "ادىرنا".
بۇگىن رەسپۋبليكا كۇنى قارساڭىندا قاسىم-جومارت توقاەۆتىڭ جارلىعىمەن ەلىمىزدىڭ الەۋمەتتىك-ەكونوميكالىق، مادەني-رۋحاني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا ەلەۋلى ۇلەس قوسقان جانە بەلسەندى قوعامدىق قىزمەت اتقارعان بىرقاتار ازامات مەملەكەتتىك ناگرادالارمەن ماراپاتتالعان بولاتىن.
ايتا كەتەيىك، مەرۋەت وتەكەشوۆا 1951 جىلى 25 اقپاندا ورال قالاسىندا دۇنيەگە كەلگەن. مارقۇم اكتەر قۇمان تاستانبەكوۆتىڭ جارى ءارى جىبەك، توميريس ەسىمدى قىزداردىڭ جانە فارابي ەسىمدى ۇلدىڭ اناسى.
ول 1968 جىلى الماتى قالاسىنداعى №66 مەكتەپتى تامامداعانىندا «قىز جىبەك» كينوسىنىڭ باس كەيىپكەرىنىڭ ءرولىن سومداۋعا شاقىرتۋ الادى.
1982 جىلى «قاراگوز» قويىلىمىنداعى قاراگوز ءرولى ءۇشىن ماسكەۋدەگى بۇكىل وداقتىق جاستار شىعارماشىلىعى بايقاۋىنىڭ لاۋرەاتى اتاندى. 1982 جىلى قازاقستان ەڭبەك سىڭىرگەن ءارتىسى اتاعىن يەلەنىپ، رەسپۋبليكالىق «جىگەر» فەستيۆالىنىڭ لاۋرەاتى بولدى. 1991 جىلى كسرو كينەماتوگرافيستەر وداعىنىڭ مۇشەسى بولىپ، 2008 جىلى «قۇرمەت» وردەنىنىڭ يەگەرى اتاندى. بۇدان وزگە 2016 جىلى «قازاقستان رەسپۋبليكاسىنىڭ تاۋەلسىزدىگىنە 25 جىل» مەدالىمەن ماراپاتتالدى.
