سەربيانىڭ نوۆي-ساد قالاسىندا ءوتىپ جاتقان كۇرەس تۇرلەرىنەن 23 جاسقا دەيىنگى الەم چەمپيوناتىندا ايەلدەر اراسىنداعى باسەكەدە قازاقستان قۇراماسى تۇڭعىش رەت التىن مەدال جەڭىپ الدى، دەپ حابارلايدى "ادىرنا" ۇلتتىق پورتالى.
55 كەلى سالماقتا سىنعا تۇسكەن شۇعىلا ومىربەك فينالدىق بەلدەسۋدە بىرنەشە جاس ساناتىندا ەۋروپا چەمپيونى اتانعان تۇركيالىق تۋبا دەميردى 12:8 ەسەبىمەن ۇتىپ، تاريحي جەتىستىككە قول جەتكىزدى.
جارىس بارىسىندا قازاقستاندىق بالۋان 23 جاسقا دەيىنگى الەم چەمپيوناتىنىڭ كۇمىس جۇلدەگەرى ميحاەل سيموندى (مولدوۆا) 10:2, كادەتتەر اراسىنداعى الەم چەمپيوناتىنىڭ كۇمىس جۇلدەگەرى الەكساندرا ۆويچيلەسكۋدى (رۋمىنيا) 3:1, ال جارتىلاي فينالدا 20 جاسقا دەيىنگى ەۋروپا چەمپيونى اموري ءاندريحتى (گەرمانيا) 2:0 ەسەبىمەن ۇتتى.
ايتا كەتەيىك، 2017 جىلدان بەرى ۇيىمداستىرىلىپ كەلە جاتقان U23 الەم چەمپيوناتىندا وسىعان دەيىن بىردە-ءبىر قازاقستاندىق ارۋ فينالعا دەيىن جەتپەگەن ەدى.
مەملەكەت باسشىسى قاسىم-جومارت توقاەۆ شۇعىلا ومىربەكتى جەڭىسىمەن قۇتتىقتادى.
«بۇل – تاريحي جەڭىس. ويتكەنى ەلىمىز مۇنداي حالىقارالىق جارىستا العاش رەت التىن مەدال يەلەنىپ وتىر. ءار سالادا ءوزىنىڭ تاباندىلىعىمەن، ەڭبەكقورلىعىمەن تابىسقا جەتەتىن جاستاردىڭ ءوسىپ كەلە جاتقانى قۋانتادى. شۇعىلانىڭ الداعى ۋاقىتتا دا بيىك بەلەستەردى باعىندىرا بەرۋىنە تىلەكتەستىك بىلدىرەمىن!» - دەدى مەملەكەت باسشىسى
23 جاسقا دەيىنگى جاھاندىق دودانىڭ تاريحىنا كوز جۇگىرتسەك، 2023 جىلى سۇلتان اسەتۇلى (67 كەلى، گرەك-ريم كۇرەسى) جانە 2024 جىلى ريزابەك ايتمۇحان (97 كەلى، ەركىن كۇرەس) چەمپيون اتانعان بولاتىن.
شۇعىلا ومىربەكتىڭ بۇعان دەيىنگى ەڭ ءىرى جەتىستىگى 2024 جىلى يوردانيادا وتكەن U23 ازيا چەمپيوناتىنداعى كۇمىس جۇلدەسى ەدى.
