اقش پرەزيدەنتى دونالد ترامپ جاپونيانىڭ جاڭا پرەمەر-ءمينيسترى ساناە تاكايتيمەن العاش رەت كەزدەستى، دەپ حابارلايدى "ادىرنا" ۇلتتىق پورتالى Reuters-كە سىلتەپ.
بۇل كەزدەسۋ اقش پرەزيدەنتىنىڭ 28 قازان كۇنى توكيوعا رەسمي ساپارى بارىسىندا بولعان.
قوس تاراپ امەريكا-جاپون اليانسىن جاڭا دەڭگەيگە كوتەرۋگە ۋاعدالاستى جانە سيرەك جەر مەتالدارى سالاسىندا ىنتىماقتاستىق تۋرالى كەلىسىمگە قول قويدى. بۇل باستامانىڭ ماقساتى — قىتايعا تاۋەلدىلىكتى ازايتۋ.
ترامپ كەزدەسۋدىڭ باسىندا مارقۇم سيندزو ابە تۋرالى ەستەلىكتەرمەن ءبولىسىپ، تاكايتيدىڭ ونىڭ ساياسي ءىسىن لايىقتى جالعاستىراتىنىنا سەنىم ءبىلدىردى.
"مەن سيندزودان ءسىز تۋرالى كوپ ەستىدىم. ءسىز جاپونيانىڭ ۇلى پرەمەر-مينيسترلەرىنىڭ ءبىرى بولاسىز", — دەدى ترامپ.
ءوز كەزەگىندە ساناە تاكايتي اقش پەن جاپونيا اراسىنداعى قاتىناستاردى «جاڭا التىن داۋىرگە» جەتكىزۋگە ۋادە بەردى جانە ترامپتىڭ حالىقارالىق بەيبىتشىلىك ورناتۋداعى ەڭبەگىن اتاپ ءوتىپ، ونى نوبەل سىيلىعىنا ۇسىناتىنىن ايتتى.
كەزدەسۋ بارىسىندا جاپونيا اقش-قا 550 ميلليارد دوللار كولەمىندە ينۆەستيتسيا سالاتىنىن جانە امەريكالىق تاۋارلاردى كوبىرەك ساتىپ الۋعا نيەتتى ەكەنىن مالىمدەدى. سونداي-اق، اقش جاپونياعا F-35 ۇشاقتارىنا ارنالعان راكەتالاردىڭ العاشقى پارتياسىن جەتكىزۋگە كەلىستى.
ترامپقا ساناە تاكايتي ەرەكشە سىيلىقتار تارتۋ ەتتى. سيندزو ابە ويناعان گولف تاياقشاسى، جاپون گولفشىسى حيدەكي ماتسۋيامانىڭ قولتاڭباسى بار سومكە جانە «Japan is back» جازۋى بار ەكى بەيسبولكا.
كەلىسسوزدەردەن كەيىن ەكى ەل باسشىلارى امەريكالىق اسكەري-تەڭىز بازاسىنا بارىپ، تەڭىز كۇشتەرى ساربازدارىمەن كەزدەستى.
"بۇل ايەل — ناعىز جەڭىمپاز", — دەپ اتاپ ءوتتى دونالد ترامپ جاپونيا پرەمەرى تۋرالى.
