قىتايدىڭ XPeng ەلەكتروموبيل ءوندىرۋشى كومپانياسى Land Aircraft Carrier ءاۆتوموبيلىنىڭ العاشقى ءمودۋلىن قۇراستىردى. وسىلايشا ەلدە ۇشاتىن اۆتوكولىك ءوندىرىسى باستالدى، دەپ حابارلايدى «ادىرنا» ءتىلشىسى «سينحۋا» اگەنتتىگىنە سىلتەمە جاساپ.
گۋانچجوۋ قالاسىندا ورنالاسقان زاۋىتتىڭ قۇرىلىسى وتكەن جىلدىڭ قازان ايىندا باستالىپ، بيىل قىركۇيەكتە ىسكە قوسىلعان. جالپى اۋماعى 120 مىڭ شارشى مەتردى قۇرايدى.
باستاپقى كەزەڭدە زاۋىت جىلىنا 5 مىڭ مودۋل جينايدى، كەيىن كورسەتكىشتى 10 مىڭعا دەيىن ارتتىرۋدى جوسپارلاپ وتىر.
«بۇل — الەمدەگى باسقا دا ۇقساس زاۋىتتارمەن پارا-پار ەڭ ءىرى وندىرىستىك قۋات. زاۋىت تولىق ىسكە قوسىلعاننان كەيىن ءار 30 مينۋت سايىن ءبىر ۇشاتىن اپپارات قۇراستىرادى»،—دەلىنگەن حابارلامادا.
XPeng كومپانياسى العاشقى ءونىمىن تانىستىرعاننان كەيىن 5 مىڭعا جۋىق ۇشاتىن كولىككە تاپسىرىس العان. سەريالىق ءوندىرۋ جانە جەتكىزۋ 2026 جىلعا جوسپارلانىپ وتىر.
