اقش مەملەكەتتىك دەپارتامەنتى سيريانىڭ ۋاقىتشا پرەزيدەنتىن تەرروريستەر تىزىمىنەن شىعاردى، دەپ حابارلايدى "ادىرنا" ۇلتتىق پورتالى.
احماد اش-شاراانى جانە ەلدىڭ ىشكى ىستەر ءمينيسترى اناس حاسان حاتتابتى تەرروريستەر تىزىمىنەن شىعاردى. بۇل تۋرالى 7 قاراشا كۇنى جاريالانعان.
بۇۇ قاۋىپسىزدىك كەڭەسىنىڭ اقش ۇسىنعان قارارىن قابىلداۋى «سيريانىڭ جاڭا ساياسي كەزەڭگە اياق باسقانىن بىلدىرەتىن ماڭىزدى بەلگى» رەتىندە باعالاندى.
«پرەزيدەنت اش-شاراا باستاعان جاڭا سيريا ۇكىمەتى جوعالعان امەريكالىقتاردى ىزدەۋگە، تەرروريزم مەن ەسىرتكىگە قارسى كۇرەستى كۇشەيتۋگە، حيميالىق قارۋ قالدىقتارىن جويۋعا جانە ايماقتىق تۇراقتىلىقتى قامتاماسىز ەتۋگە باعىتتالعان مىندەتتەمەلەردى ورىنداۋدا. سونداي-اق داماسك سيريا باسقاراتىن ينكليۋزيۆتى ساياسي پروتسەستى دامىتۋعا كۇش سالۋدا»، – دەلىنگەن مەملەكەتتىك دەپارتامەنتتىڭ مالىمدەمەسىندە.
10 قاراشادا احماد اش-شاراا ۆاشينگتونعا العاشقى رەسمي ساپارىن جاساماق. وندا ول اقش پرەزيدەنتى دونالد ترامپپەن كەزدەسىپ، امەريكا باستاعان «يسلام مەملەكەتىنە» (قازاقستاندا تىيىم سالىنعان ۇيىم) قارسى كواليتسياعا قوسىلۋ تۋرالى كەلىسىمگە قول قويۋى جوسپارلانعان.
بۇۇ قاۋىپسىزدىك كەڭەسى 6 قاراشادا سيريا پرەزيدەنتى مەن ىشكى ىستەر مينيسترىنە قارسى سانكتسيالاردى الىپ تاستاۋ تۋرالى شەشىم قابىلدادى. قاۋىپسىزدىك كەڭەسىنىڭ 15 مۇشەسىنىڭ 14-ءى اقش ۇسىنعان قاراردى قولداسا، قىتاي قالىس قالدى.
بۇل شەشىمنەن كەيىن ەكى شەنەۋنىك لوندونداعى سانكتسيالار تىزىمىنەن دە شىعارىلدى.
