قىتايدىڭ Xi’an Jiaotong University جانىنان «شاكارىم» مادەني زەرتتەۋلەر ورتالىعى اشىلدى. بۇل تۋرالى بۇگىن، 10 قاراشادا عىلىم جانە جوعارى ءبىلىم مينيسترلىگى ايتتى، دەپ حابارلايدى «ادىرنا» ءتىلشىسى.
مينيسترلىك قىتايدىڭ سيان تسزياوتۋن ۋنيۆەرسيتەتىندە ء«بىر بەلدەۋ – ءبىر جول» باستاماسىنىڭ وزىق عىلىمي-تەحنولوگيالىق جەتىستىكتەرىمەن الماسۋ جونىندەگى حالىقارالىق كونفەرەنتسيا ۇيىمداستىرىلعانىن مالىمدەدى.
«كونفەرەنتسيا اياسىندا سيان تسزياوتۋن ۋنيۆەرسيتەتى تاراپىنان شاكارىم ۋنيۆەرسيتەتىنە «ەلەكترلىك اۆتوماتتاندىرۋ جونىندەگى قازاقستان-قىتاي بىرلەسكەن زەرتحاناسىنا» ارنالعان جابدىقتاردىڭ العاشقى پارتياسىن بەرۋ تۋرالى ەستەلىك سەرتيفيكات تابىس ەتىلدى. سونداي-اق «شاكارىم» قازاق-قىتاي مادەني زەرتتەۋلەر ورتالىعىنىڭ سالتاناتتى اشىلۋى ءوتتى»،- دەلىنگەن حابارلامادا.
جاڭادان قۇرىلاتىن زەرتحانا ەكى ەل اراسىنداعى تەحنولوگيا الماسۋ مەن وندىرىستىك سەرىكتەستىكتى دامىتۋدا ماڭىزدى ءرول اتقارىپ، عىلىمي جاڭالىقتارعا نەگىزدەلگەن ورتاق ەكونوميكالىق تىزبەكتىڭ دامۋىن جىلدامداتادى. جوبانىڭ نەگىزگى ماقساتى – وڭىردەگى يننوۆاتسيالاردى دامىتۋ، ءوندىرىستى جاڭارتۋ جانە عىلىم مەن ءوندىرىس اراسىنداعى بايلانىستى نىعايتۋ.
ال «شاكارىم» قازاق-قىتاي مادەني زەرتتەۋلەر ورتالىعى – ۇلى ويشىلدىڭ شىعارماشىلىعى مەن فيلوسوفياسىنا ارنالعان شەتەلدەگى تۇڭعىش ينستيتۋتسيونالدى ورتالىق. حالىقارالىق دەڭگەيدە اشىلىپ وتىرعان ورتالىقتىڭ نەگىزگى مىندەتى – قازاقستاننىڭ تاريحى مەن مادەنيەتىن، سونىڭ ىشىندە شاكارىم مۇراسىن تەرەڭ زەردەلەۋ، سونداي-اق بىرلەسكەن ءبىلىم بەرۋ جانە عىلىمي-زەرتتەۋ جوبالارىن ىسكە اسىرۋداعى ءوزارا ءتيىمدى پلاتفورمانى قالىپتاستىرۋ، قازاق مادەنيەتىن قىتايدا كەڭىنەن تانىستىرۋ، ەكى ەل اراسىنداعى مادەني جانە عىلىمي بايلانىستاردى نىعايتۋ.
ايتا كەتەيىك، ورتالىق عىلىم جانە جوعارى ءبىلىم مينيسترلىگىنىڭ قولداۋىمەن، شاكارىم ۋنيۆەرسيتەتى مەن سيان تسزياوتۋن ۋنيۆەرسيتەتىنىڭ سەرىكتەستىگىنىڭ ناتيجەسىندە اشىلىپ وتىر. كەلۋشىلەر ورتالىقتان شاكارىم قۇدايبەردىۇلىنىڭ ءومىرى مەن مول مۇراسى تۋرالى قازاق جانە قىتاي تىلدەرىندە تولىق اقپارات الا الادى. سونىمەن قاتار قازاق حالقىنىڭ ەجەلگى داۋىردەن بۇگىنگە دەيىنگى مادەني دامۋ كەزەڭدەرى تۋرالى ماتەريالدار ۇسىنىلادى.
