فوتو: Associated Press
سوڭعى كۇندەرى رەسەي سىرتقى ىستەر ءمينيسترى سەرگەي لاۆروۆتىڭ كوپشىلىك الدىندا كورىنبەۋى مەن ونىڭ قىزمەتىنەن كەتۋى تۋرالى ءتۇرلى قاۋەسەتتەر شەتەلدىك جانە ينتەرنەت باسىلىمداردا كەڭىنەن تاراعان ەدى. وسىعان بايلانىستى كرەمل وكىلى دميتري پەسكوۆ جاۋاپ بەردى، دەپ حابارلايدى “ادىرنا”.
پەسكوۆتىڭ ايتۋىنشا، سەرگەي لاۆروۆ ءوز قىزمەتىن ادەتتەگىدەي جالعاستىرىپ جاتىر، ال ونىڭ دەنساۋلىعى مەن قىزمەتتىك جاعدايىنا قاتىستى تاراعان بارلىق حابارلامالار «مۇلدە جالعان».
«ولارعا نازار اۋدارۋدىڭ قاجەتى جوق»، – دەدى كرەمل وكىلى.
سونىمەن قاتار پەسكوۆ سىرتقى ىستەر ءمينيسترىنىڭ كوپ ۇزاماي كوپشىلىك الدىنا شىعاتىنىن دا مەڭزەدى.
«قاجەتتى رەسمي ءىس-شارالار وتكەن كەزدە سىزدەر سەرگەي ۆيكتوروۆيچتى كورەسىزدەر»، – دەپ ناقتىلادى ول فرانس-پرەسس اگەنتتىگىنىڭ سۇراعىنا جاۋاپ بەرۋ بارىسىندا.
بولجام بويىنشا، ءمينيستردىڭ قاتىسۋىن قاجەت ەتەتىن ەڭ جاقىن رەسمي شارا – قازاقستان پرەزيدەنتىنىڭ رەسەيگە جاسايتىن مەملەكەتتىك ساپارى. بۇل ساپار 11–12 قاراشا كۇندەرى وتەدى، ال نەگىزگى رەسمي ءىس-شارالار كرەملدە 12 قاراشادا جوسپارلانعان.
ايتا كەتسەك، بۇعان دەيىن رەسەيدىڭ سىرتقى ىستەر ءمينيسترى سەرگەي لاۆروۆ پرەزيدەنت ۆلاديمير ءپۋتيننىڭ سەنىمىنەن ايىرىلعانى تۋرالى اقپارات تاراعانىن حابارلادىق.
اقپاراتقا سايكەس، لاۆروۆ رەسەي قاۋىپسىزدىك كەڭەسىنىڭ 5 قاراشادا وتكەن وتىرىسىنا قاتىسپاعان جانە G20 سامميتىندە رەسەيلىك دەلەگاتسياعا دا جەتەكشىلىك ەتپەيتىن بولعان.
لاۆروۆ 2004 جىلدان بەرى رەسەي سىرتقى ىستەر ءمينيسترى قىزمەتىن اتقارىپ كەلەدى.
