ءماجىلىس دەپۋتاتى اسحات ايماعامبەتوۆ جاساندى ينتەللەكت جانە تسيفرلىق دامۋ مينيسترلىگىنە بالالاردىڭ جەلىدەگى بەلسەندىلىگى تۋرالى دەپۋتاتتىق ساۋال جولدادى، دەپ حابارلايدى «ادىرنا» ءتىلشىسى.
ايتۋىنشا، بالالاردىڭ كوپشىلىگى الەۋمەتتىك جەلىگە اتا-اناسىنىڭ رۇقساتىنسىز 5–6 جاستان باستاپ تىركەلىپ الادى.
"قازاقستاندا بالا TikTok نەمەسە Instagram-عا 5–6 جاستان باستاپ ەش كەدەرگىسىز تىركەلە الادى. ال كوپتەگەن ەلدە بۇل ماسەلە زاڭمەن رەتتەلگەن. مىسالى دانيا مەن اۆستراليادا تىركەلۋگە رۇقسات جاسى — 15–16 جاس. اقش، ۇلىبريتانيا جانە يرلانديادا دا جاس بويىنشا شەكتەۋلەر ەنگىزىلگەن. الەۋمەتتىك جەلىگە تىركەلۋ تەك اتا-اناسىنىڭ راستالعان كەلىسىمىمەن عانا جۇزەگە اسادى. تسيفرلىق دامۋ مينيسترلىگى مەن وقۋ-اعارتۋ مينيسترلىگى وسى ماسەلە بويىنشا پوزيتستياسى بار ما؟"–دەدى دەپۋتات.
ودان بولەك، ايماعامبەتوۆ مەكتەپتەردە سمارتفون قولدانۋعا قاتىستى مەملەكەتتىك ۇستانىمنىڭ بار-جوعىن سۇرادى.
"انگليا، نيدەرلاند جانە الەمنىڭ 40%-دان استام ەلدەرى مەكتەپتەردە سمارتفون قولدانۋعا رەسمي تۇردە تىيىم سالعان. قازاقستاندا دا بىرقاتار الدىڭعى قاتارلى مەكتەپتەر — NIS, بيل، «دارىن» ساباق كەزىندە سمارتفون قولدانۋعا شەكتەۋ قويدى. ناتيجەسى وتە جاقسى. وڭ اسەرى بايقالدى، بالالار بەلسەندىرەك، ءبىر-بىرىمەن ءجيى تىلدەسەدى، ساباق كەزىندە الاڭداۋشىلىق ازايدى. الايدا ەلدەگى كوپتەگەن مەكتەپتەردە جاعداي وزگەشە. مۇعالىمدەر جانجالدان قورقادى، ال وقۋشىلار ساباق پەن ءۇزىلىس كەزىندە TikTok-تا ساعاتتاپ وتىرادى. تسيفرلىق دامۋ جانە وقۋ-اعارتۋ مينيسترلىكتەرى بۇل ماسەلەنى جۇيەلى تۇردە شەشۋ ءۇشىن قانداي ۇسىنىستارى بار؟",–دەدى ول.
ءوز كەزەگىندە جاساندى ينتەللەكت جانە تسيفرلىق دامۋ ۆيتسە-ءمينيسترى دميتري مۋن ازىرگە مۇنداي شەكتەۋ ەنگىزۋ جوسپارلانباعانىن، بىراق ماسەلە تالقىلانىپ جاتقانىن ايتتى.
سونداي-اق ول بالالاردى تەحنولوگيانى قاۋىپسىز ءارى پايدالى قولدانۋعا ۇيرەتۋدىڭ ماڭىزدى ەكەنىن اتاپ ءوتتى.
«مينيسترلىكتىڭ ۇستانىمى — جاڭا ۇرپاقتى دۇرىس وقىتۋ. تەحنيكا، جاساندى ينتەللەكت جانە ينتەرنەتپەن جۇمىس ىستەۋدە ارتتا قالۋ قاۋپى بولماۋى ءتيىس»، — دەدى ۆيتسە-مينيستر.
