شەكارانىڭ قازاقستان بەتىندە قىتاي تۋىن ورتەگەندەر جاۋاپقا تارتىلدى

13 قاراشا كۇنى الماتى وبلىسىنىڭ ۇيعىر اۋدانىندا شامامەن 30 ادام قاتىسقان رەزونانستى اكتسيا ءوتتى. جينالعاندار قىتاي حالىق رەسپۋبليكاسىنىڭ تۋىن جانە قحر توراعاسى سي ءتسزينپيننىڭ پورترەتىن ورتەپ، وسىلايشا قىتايدا قاماۋدا وتىرعان قازاقستان ازاماتى اليمنۇر تۇرعانبايدى بوساتۋدى تالاپ ەتتى. وقيعاعا بايلانىستى ارازدىق تۋدىرۋ فاكتىسى بويىنشا قىلمىستىق ءىس تىركەلدى، دەپ حابارلايدى "ادىرنا".

ايتا كەتسەك، اليمنۇر تۇرعانباي – قىتايدىڭ ىلە قازاق اۆتونوميالىق وكرۋگىنىڭ تۋماسى. ول 2017 جىلى قازاقستان ازاماتتىعىن العان.
2024 جىلدىڭ جازىندا قىتاي شەكارا قىزمەتى ونى ۇستاپ، سودان بەرى ءتورت اي بويى ول تۋىستارىمەن بايلانىسپاعان.

وتباسىنىڭ ايتۋىنشا، اليمنۇر قىتاي ازاماتتىعىنان رەسمي تۇردە باس تارتقان. ال قازاقستان بيلىگى ونىڭ ۇستالۋىن قوس ازاماتتىقپەن بايلانىستىرۋى مۇمكىن ەكەنىن حابارلاعان.

تامىز ايىندا اليمنۇردىڭ ايەلى مەن قىزى الماتى اكىمدىگى الدىندا پرەزيدەنت قاسىم-جومارت توقاەۆتىڭ اتىنا ۆيدەوۇندەۋ جاساپ، تۇرعانبايدى ەلگە قايتارۋعا كومەكتەسۋدى سۇراعان. ولار قىتاي كونسۋلدىعى مەن ءسىم وكىلدىگى الدىندا بىرنەشە رەت اكتسيا وتكىزگەن، سول ءۇشىن بىرنەشە رەت پوليتسياعا جەتكىزىلىپ، ايىپپۇل سالىنعان.

كەشە ۇيعىر اۋدانىندا شامامەن 30 ادام جينالىپ، قازاق جانە قىتاي تىلدەرىندە ۇندەۋ جاساپ، قىتايدىڭ تۋى مەن سي ءتسزينپيننىڭ پورترەتىن ورتەدى.
قاتىسۋشىلاردىڭ ءبىرى:
«اليمنۇر ءتورت ايدان بەرى سەبەپسىز قاماۋدا. ءبىز ونى بوساتقانشا ارەكەتىمىزدى توقتاتپايمىز»، – دەسە، تاعى ءبىرى «قىتايلار ءبىزدىڭ باۋىرلارىمىزدى لاگەرگە قاماپ وتىر» دەپ مالىمدەدى.

وقيعا ورنىنا دەر كەزىندە جەتكەن پوليتسيا توپتى تاراتىپ، قاتىسۋشىلاردى ۇستادى.

"ماتەريالداردى سوتتا قاراۋ قورىتىندىسى بويىنشا 12 ازامات قر اقبتك-ءنىڭ 434-بابى بويىنشا اكىمشىلىك جاۋاپكەرشىلىككە تارتىلىپ، 15 تاۋلىككە دەيىنگى مەرزىمگە اكىمشىلىك قاماۋعا الىندى.

سونىمەن قاتار، تاعى 6 قاتىسۋشىعا 20 اەك مولشەرىندە ايىپپۇل سالىندى", – دەلىنگەن رەسمي حابارلامادا. 

قازىر بۇل وقيعا بويىنشا قاجەتتى تەرگەۋ ارەكەتتەرى جالعاسىپ جاتىر.

پوليتسيا مەملەكەتتىك رامىزدەرگە قول سۇعۋ، ارازدىق تۋدىرۋ جانە قوعامدىق قاۋىپسىزدىكتى بۇزۋعا باعىتتالعان كەز كەلگەن ارەكەت — زاڭنىڭ ورەسكەل بۇزىلۋى ەكەنىن ەسكەرتىپ، مۇنداي فاكتىلەردىڭ قاتاڭ زاڭ تارتىبىمەن دەرەۋ توقتاتىلاتىنىن مالىمدەدى.