الماتى وبلىسىنىڭ ىلە اۋدانىنا قاراستى بايسەركە اۋىلىندا «بايسەركە اسپانى – 2026» اۆياتسيالىق مەرەكەسى باستالدى. اشىق اسپان استىنداعى شارا اۆياتسيا اۋەسقويلارىن، سالا ماماندارىن، ءوڭىر تۇرعىندارى مەن قوناقتارىن ءبىر الاڭعا جينادى.
اۆياتسيالىق مەرەكە اياسىندا وتكەن ءباسپاسوز ماجىلىسىندە قازاقستانداعى شاعىن اۆياتسيانى دامىتۋ، جاستاردى تەحنيكالىق ماماندىقتارعا تارتۋ، اۆياتسيالىق مادەنيەتتى قالىپتاستىرۋ جانە الماتى وبلىسىنىڭ تۋريستىك الەۋەتىن ارتتىرۋ ماسەلەلەرى تالقىلاندى.
جيىنعا «سپ «بايتەرەك» اق باسقارما توراعاسى، قازاقستاننىڭ حالىق قاھارمانى، ۇشقىش-عارىشكەر ايدىن ايىمبەتوۆ، «وتان» اەروكلۋبى قوعامدىق بىرلەستىگىنىڭ باسشىسى يۋري ەلتسوۆ، «تيان-شان» اۆياتسيالىق ۇشۋ ورتالىعىنىڭ باس ديرەكتورى ۆلاديمير انتسۋپوۆ جانە قازاقستاندىق شاعىن اۆياتسيا قاۋىمداستىعىنىڭ پرەزيدەنتى ومىربەك كەڭەسباەۆ قاتىستى.
ءباسپاسوز ماجىلىسىندە ماماندار اۆياتسيانى تەك كاسىبي سالامەن شەكتەپ قاراۋعا بولمايتىنىن اتاپ ءوتتى. ولاردىڭ پىكىرىنشە، اۆياتسيا – جاستاردىڭ تەحنيكا مەن ينجەنەرياعا قىزىعۋشىلىعىن ارتتىرىپ، بولاشاق ماماندىعىن تاڭداۋعا ىقپال ەتەتىن ماڭىزدى باعىتتاردىڭ ءبىرى.
وسى ورايدا كوپشىلىككە ارنالعان اۆياتسيالىق شارالاردىڭ رولىنە ەرەكشە نازار اۋدارىلدى. مۇنداي الاڭدار تۇرعىندارعا اۆياتسيانىڭ مۇمكىندىكتەرىن جاقىننان تانىپ قانا قويماي، وسى سالادا ەڭبەك ەتەتىن ماماندارمەن تىكەلەي جۇزدەسۋگە مۇمكىندىك بەرەدى.
سالا وكىلدەرى اسىرەسە بالالار مەن جاسوسپىرىمدەردىڭ ۇشقىش، ينجەنەر، تەحنيك سەكىلدى ماماندىقتارعا قىزىعۋشىلىعىن ارتتىرۋ ماڭىزدى ەكەنىن ايتتى. اۆياتسيالىق تەحنيكانى ءوز كوزىمەن كورۋ، كاسىبي ماماندارمەن سويلەسۋ جانە اۋە كەمەلەرىنىڭ جۇمىسىمەن تانىسۋ جاستاردىڭ بولاشاق كاسىبي باعدارىن ايقىنداۋىنا ىقپال ەتۋى مۇمكىن.
سونىمەن قاتار، جيىندا شاعىن اۆياتسيانى دامىتۋ ماسەلەسى كوتەرىلدى. ماماندار بۇل باعىتتى ىلگەرىلەتۋ ءۇشىن ينفراقۇرىلىممەن قاتار قوعامدا اۆياتسيالىق مادەنيەتتى قالىپتاستىرۋ، اۋە كەڭىستىگىنىڭ مۇمكىندىكتەرى تۋرالى اقپاراتتى كەڭىنەن تاراتۋ جانە بۇقارالىق ءىس-شارالاردى جۇيەلى وتكىزۋ ماڭىزدى ەكەنىن اتاپ ءوتتى.
ءباسپاسوز ماجىلىسىنەن كەيىن «بايسەركە اسپانى – 2026» مەرەكەسىنىڭ نەگىزگى باعدارلاماسى باستالدى. بايسەركە اسپانىندا اۋە كەمەلەرى قالىقتاپ، الاڭدا اۆياتسيالىق تەحنيكا كوپشىلىك نازارىنا ۇسىنىلدى. ءتۇرلى كورسەتىلىمدەر مەن تانىمدىق باعدارلامالار مەرەكەنىڭ نەگىزگى بولىگىنە اينالدى.
شاراعا كەلگەن قوناقتار اۋە تەحنيكاسىن جاقىننان تاماشالاپ، اۆياتسيا سالاسىنىڭ تىنىس-تىرشىلىگىمەن تانىسۋعا مۇمكىندىك الدى. ماماندار كەلۋشىلەرگە اۋە كەمەلەرىنىڭ ەرەكشەلىكتەرى مەن اۆياتسيالىق ماماندىقتار تۋرالى اقپارات بەردى.
مەرەكەگە بالالار مەن جاسوسپىرىمدەردىڭ قىزىعۋشىلىعى دا جوعارى بولدى. ۇيىمداستىرۋشىلاردىڭ ايتۋىنشا، شارانىڭ نەگىزگى مىندەتتەرىنىڭ ءبىرى – جاس بۋىننىڭ اسپان الەمىنە دەگەن قىزىعۋشىلىعىن ناقتى ءبىلىم مەن كاسىبي باعدارعا ۇلاستىرۋ.
«بايسەركە اسپانى – 2026» اۆياتسيانى ناسيحاتتاۋمەن قاتار، الماتى وبلىسىنىڭ تۋريستىك مۇمكىندىكتەرىن تانىستىرۋدى دا كوزدەيدى. ۇيىمداستىرۋشىلار اۆياتسيا مەن ءتۋريزمدى بايلانىستىرۋ ارقىلى وڭىرگە دەگەن قىزىعۋشىلىقتى ارتتىرۋعا بولاتىنىن اتاپ ءوتتى.
الماتى وبلىسىنىڭ تابيعي ەرەكشەلىكتەرى مەن اشىق كەڭىستىگى اۆياتسيالىق تۋريزم باعىتتارىن دامىتۋعا مۇمكىندىك بەرەدى. وسى تۇرعىدان العاندا، بايسەركەدەگى مەرەكە اۋە تەحنيكاسىنىڭ كورسەتىلىمى عانا ەمەس، ءوڭىردىڭ تۋريستىك تارتىمدىلىعىن جاڭا قىرىنان تانىتاتىن الاڭ رەتىندە دە قاراستىرىلىپ وتىر.
شارا بارىسىندا كاسىبي مامانداردىڭ تاجىريبەسى، اۆياتسيالىق تەحنيكانىڭ كورسەتىلىمى مەن كوپشىلىككە ارنالعان باعدارلامالار ءوزارا ۇيلەسىم تاپتى. كەلۋشىلەر ءۇشىن بۇل اۆياتسيا الەمىن جاقىننان تانىپ، جاڭا اسەر الۋعا مۇمكىندىك بەرسە، جاستار ءۇشىن بولاشاق ماماندىعى تۋرالى ويلانۋعا سەبەپ بولاتىن تانىمدىق شاراعا اينالدى.
«بايسەركە اسپانى – 2026» مەرەكەسىنىڭ باستى يدەياسى دا وسى – اۆياتسيانى كوپشىلىككە جاقىنداتىپ، ونىڭ مۇمكىندىكتەرىن كورسەتۋ. ويتكەنى بۇگىن اسپانداعى ۇشاققا قىزىعا قاراعان بالانىڭ ەرتەڭ ۇشقىش، اۆياتسيا ينجەنەرى نەمەسە تەحنيك بولۋى ابدەن مۇمكىن.
وسىلايشا، بايسەركەدە ءوتىپ جاتقان اۆياتسيالىق مەرەكە اۋە كەمەلەرىنىڭ اسەرلى كورسەتىلىمىمەن عانا شەكتەلمەي، شاعىن اۆياتسيانى دامىتۋ، جاستاردى تەحنيكالىق ماماندىقتارعا باعىتتاۋ جانە الماتى وبلىسىنىڭ تۋريستىك الەۋەتىن تانىتۋعا ارنالعان مازمۇندى الاڭعا اينالدى.
