الماتى وبلىسىندا 10 جاستاعى بالا دارەتحانا شۇڭقىرىنا قۇلاپ كەتكەن ءبۇلدىرشىندى قۇتقارىپ قالدى، دەپ حابارلايدى «ادىرنا» ءتىلشىسى.
وقيعا 14 شىلدە كۇنى قاراساي اۋدانى ىرگەلى اۋىلىنداعى كوكدالا كوشەسىندە بولعان. كۋاگەرلەردىڭ ايتۋىنشا، اۋلادا ويناپ جۇرگەن ءۇش جاسار قىز تەرەڭدىگى شامامەن ءۇش مەترلىك اجەتحانا شۇڭقىرىنا ابايسىزدا قۇلاپ كەتكەن.
ءۇش جاسار قىزدىڭ اناسىنان قىز بالانىڭ دارەتحاناعا قۇلاپ كەتكەنىن ەستىگەن سوڭ اكەسى مەن بالاسى كومەككە اسىقتى. الدىمەن ەر ادام دارەتحانانىڭ تەسىگىنە ءوزى ءتۇسىپ كورگىسى كەلگەن. بىراق ساڭىلاۋ تىم كىشكەنتاي بولعان. سول ساتتە ون جاستاعى ءاليحان باتىلدىق تانىتىپ، كومەككە ۇمتىلعان. ول بەلىنە ارقان بايلاپ، شۇڭقىرعا تۇسكەن. شۇڭقىر تۇبىنە جەتكەن سوڭ قىزدىڭ بەلىنە دە ارقان بايلاپ، ونى جوعارىداعى ادامداردىڭ كومەگىمەن سىرتقا شىعارعان.
مامانداردىڭ ايتۋىنشا، شۇڭقىردا جينالعان ۋلى گاز سالدارىنان بالالار تۇنشىعىپ قالۋى مۇمكىن ەدى. بىراق ءاليحاننىڭ باتىل ءارى جەدەل ارەكەتىنىڭ ارقاسىندا ەكى بالا دا امان قالدى. ولارعا مەديتسينالىق كومەك قاجەت بولعان جوق.
باتىر بالا قىزدىڭ ءومىرىن ساقتاپ قالعانى ءۇشىن ۆەدومستۆولىق ماراپاتقا ۇسىنىلادى.
