الماتى وبلىسىندا رەسپۋبليكا كۇنىنە ارنالعان مەرەكەلىك شارا اياسىندا سالتاناتتى جيىن ءوتتى.
شارادا وبلىس اكىمى مارات سۇلتانعازيەۆ قاتىسۋشىلاردى مەرەكەمەن قۇتتىقتاپ، ءوڭىر مەن ەلدىڭ دامۋىنا ايتارلىقتاي ۇلەس قوسقان تۇرعىندارعا مەملەكەتتىك جانە قوعامدىق ناگرادالاردى تاپسىردى.
ءوڭىر باسشىسى ءوز سوزىندە بۇل ناگرادالار ءارتۇرلى سالادا ادال ەڭبەك ەتىپ جۇرگەن ازاماتتاردىڭ ەڭبەگىن جوعارى باعالاۋ ەكەندىگىن اتاپ ءوتتى.
«ەلىمىزدىڭ دامۋى – سىزدەردىڭ كۇندەلىكتى ادال ەڭبەكتەرىڭىزدىڭ ناتيجەسى. رەسپۋبليكا كۇنىنە ارنالعان بۇل ناگرادالار – مەملەكەت تاراپىنان سىزدەردىڭ ەڭبەكتەرىڭىزگە قۇرمەت پەن العىستىڭ بەلگىسى»، – دەدى مارات سۇلتانعازيەۆ.
اقتوعاي گەس-ءىنىڭ باس ديرەكتورى توقتاربەك بايمولداەۆ II دارەجەلى «بارىس» وردەنىنە، قانىمجان سۇلتانقۇلوۆا، روزا ابيلوۆا، قۋات بايعوجاەۆ، زيناش كۇشتەكوۆا، باقىت ونلانبەكۇلى، قالي ساتپاەۆ جانە دىنمۇحامەد كۋزيەۆ «قۇرمەت» وردەنىنە يە بولسا، كەگەن اۋدانىنداعى شارۋا قوجالىعىنىڭ جەتەكشىسى بولات اۋمولداەۆ III دارەجەلى «ەڭبەك داڭقى» وردەنىمەن ماراپاتتالدى.
سونىمەن قاتار، بىرقاتار وبلىس ازاماتتارىنا «ەرەن ەڭبەگى ءۇشىن»، «شاپاعات» مەدالدەرى جانە «مەملەكەتتىك قىزمەت ارداگەرى» توسبەلگىلەرى تاپسىرىلدى. ماراپاتتالۋشىلار قاتارىندا دارىگەرلەر، مۇعالىمدەر، مادەنيەت جانە الەۋمەتتىك سالا قىزمەتكەرلەرى، كاسىپكەرلەر بار.
«بۇل تەك مەنىڭ جەكە باسىمنىڭ ماراپاتى ەمەس، ەلىمىز – قازاقستان رەسپۋبليكاسىنىڭ يگىلىگى ءۇشىن كۇن سايىن ەڭبەك ەتەتىن ۇجىمىمىزدىڭ ەڭبەگى»، – دەدى «قۇرمەت» وردەنىنىڭ يەگەرى دىنمۇحامەد كۋزيەۆ.
شارا بارىسىندا قازاقستان حالقى اسسامبلەياسىنىڭ ناگرادالارى دا ءوز يەلەرىنە تابىس ەتىلدى. ەل بىرلىگىن نىعايتۋعا قوسقان ۇلەستەرى ءۇشىن گامزە گەيداروۆ پەن گۋليپا عايپوۆا «بىرلىك» التىن مەدالىنە يە بولسا، نۇرماحامەت ءاريپوۆ، ماقسات سەيداليەۆ جانە يسمايل بايراموۆتار مەملەكەت باسشىسىنىڭ قۇرمەت گراموتاسى مەن العىس حاتىمەن ماراپاتتالدى.
سونىمەن قاتار، وبلىستىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان ون ەكى وبلىس تۇرعىنىنا «ايماققا ەڭبەگى ءۇشىن» توسبەلگىسى تابىستالدى.
سالتاناتتى شارادا قازاقستاننىڭ حالىق ءارتىسى، «اقجاۋىن» وركەسترىنىڭ كوركەمدىك جەتەكشىسى سەكەن تۇرىسبەككە «ەليتستروي» كومپانياسى پاتەر كىلتىن تارتۋ ەتتى. بۇل سىي - ونەر يەسىنىڭ ۇلتتىق مادەنيەتتى دامىتۋداعى ەڭبەگىن مويىنداۋ بولىپ تابىلادى.
شارا سوڭىندا وبلىس اكىمى ماراپات يەلەرىنە مىقتى دەنساۋلىق، جاڭا جەتىستىكتەر مەن ەل يگىلىگى ءۇشىن اتقاراتىن ەڭبەكتەرىندە ساتتىلىك تىلەدى.
سالتاناتتى ءراسىم ەسترادا جۇلدىزدارىنىڭ قاتىسۋىمەن كونتسەرتتىك باعدارلامامەن جالعاسىن تاپتى.
ەسكە سالا كەتەيىك، بۇگىن كوناەۆ قالاسىنىڭ ورتالىق الاڭىندا مەرەكەلىك عاجايىپ دروندار شوۋى كورسەتىلەدى.
