الماتىدا وتكەن XIII قارجىگەرلەر كونگرەسسىندە ۇلتتىق بانك توراعاسى تيمۋر سۇلەيمەنوۆ ەكونوميكاداعى جوعارى ءوسىم كەزىندە حالىق تابىسىنىڭ نەگە تومەندەپ جاتقانىن ءتۇسىندىردى، دەپ حابارلايدى "ادىرنا" ۇلتتىق پورتالى.
سەسسيانىڭ مودەراتورى، ۇلتتىق بانكتىڭ ەكس-باسشىسى وراز جاندوسوۆ قازاقستانداعى جاعدايدىڭ قايشىلىقتى ەكەنىن اتاپ ءوتتى. III توقساندا ەكونوميكا 6,5% ءوسىم كورسەتكەنىمەن، ناقتى جالاقى ءبىر جىلدا 2%-عا تومەندەگەن. سونىمەن قاتار، قازان ايىندا ينفلياتسيا 12,6%-عا جەتىپ، جوعارى دەڭگەيدە قالىپ وتىر.
جاندوسوۆتىڭ ء«وسىمدى جوعالتپاي، حالىق تابىسىن ارتتىرىپ، ينفلياتسيانى 7–8% دەڭگەيىنە قالاي تۇسىرەمىز؟» دەگەن سۇراعىنا جاۋاپ بەرگەن تيمۋر سۇلەيمەنوۆ نەگىزگى قيىندىق ينفلياتسيا ەكەنىن ايتتى.
«ەكونوميكا 6,5% وسسە دە، ناقتى تابىس شامامەن نولگە جاقىن نەمەسە ازداپ مينۋسقا تۇسكەن. سەبەبى ينفلياتسيا وتە جوعارى. بۇل — باستى سىن-قاتەر»، – دەدى ول.
سۇلەيمەنوۆتىڭ ايتۋىنشا، COVID جانە پوست-COVID كەزەڭىندە كەڭەيگەن بيۋدجەتتىك-سالىقتىق ساياسات كەيىنگى جىلدارى دا ەكسپانسيالىق سيپاتتا قالىپ قويعان. ۇكىمەت ناتسفوندتان كوبىرەك قاراجات پايدالانعان، بيۋدجەت تاپشىلىعى دا جوعارى بولعان.
ونىڭ پىكىرىنشە، الداعى سالىق جانە بيۋدجەتتىك رەفورمالار ينفلياتسيانى ايتارلىقتاي تومەندەتەتىن بولادى. بولجام بويىنشا، بيۋدجەت تاپشىلىعى 2,5–2,7%-دان 0,9%-عا دەيىن قىسقارادى.
سۇلەيمەنوۆ ءسوزىن اياقتاعان سوڭ، وراز جاندوسوۆ قىرعىزستان ەكونوميكاسىنىڭ سوڭعى جىلدارى 10% تۇراقتى ءوسىم كورسەتكەنىن، حالىق تابىسى دا ءوسىپ جاتقانىن اتاپ ءوتتى.
ء«بىز قىرعىزستاننان الدا ءجۇرمىز دەگەن پىكىر بار. بىراق شىن مانىندە، ولاي ەمەس. تاريحي تۇرعىدا دا ولار كەي قادامداردى بىزدەن بۇرىن جاساعان. قازىر دە ەكونوميكاسى بەلسەندى ءوسىپ كەلەدى»، — دەدى ول.
كونگرەسس بارىسىندا تيمۋر سۇلەيمەنوۆ قازاقستاندا باعالى قاعازدار نارىعىندا اۋقىمدى رەفورمالار جۇرگىزىلەتىنىن دە مالىمدەدى.
