قاراعاندى وبلىسى اكىمىنىڭ قولداۋىمەن جاريالانعان 2025 جىل – جۇمىسشى ماماندىقتار جىلى جانە قازاقستان حالقى اسسامبلەياسىنىڭ 30 جىلدىعىنا ارنالعان «ادال ەڭبەك پەن ىنتىماق – ەل يگىلىگى» جوباسىنىڭ اياسىنداعى مازمۇندى شارالار نۇرا اۋدانىندا جالعاسىن تاپتى.
نۇرا ءوڭىرىنىڭ مادەنيەت ۇيىندە وتكەن رۋحاني كەزدەسۋگە جوبانىڭ اۆتورى، حالىقارالىق جانە رەسپۋبليكالىق ايتىستاردىڭ لاۋرەاتى، قر مادەنيەت سالاسىنىڭ ۇزدىگى، اقىن، بارد، قوعام قايراتكەرى قۋانىش ماقسۇتوۆ ارنايى كەلدى. شاراعا جينالعان جۇرتشىلىق الدىمەن ەڭبەك تاقىرىبىن، اۋدان تاريحى مەن تۇلعالارىن قامتىعان كەڭ كولەمدى كورمەنى تاماشالادى.
كەزدەسۋ بارىسىندا اقىن ەلدىك ۇستانىم، ەڭبەكتىڭ قادىرى، رۋحاني قۇندىلىقتار، تۋعان ولكەنىڭ ورنى مەن ۇلت تۇلعالارىنىڭ تاعىلىمى تۋرالى اسەرلى وي-تولعامىن ورتاعا سالدى. «سارى تەنتەك» اتانعان اقىن كورەرمەن سۇراقتارىنا جاۋاپ بەرىپ، ەركىن پىكىر الماسۋ فورماتىندا اڭگىمە ءوربىتتى.
شارا اياسىندا قۋانىش ماقسۇتوۆ نۇرا وڭىرىنەن شىققان ەلگە ەڭبەگى سىڭگەن ارداگەر تۇلعالارعا وبلىس اكىمىنىڭ قولداۋىمەن جارىق كورگەن جاڭا كىتابىن تارتۋ ەتتى. القا-قوتان قازاقى داستۇردە وتكەن بۇل كەش اۋداننىڭ مادەني ومىرىندەگى ماڭىزدى رۋحاني وقيعالاردىڭ بىرىنە اينالدى.
كەش قوناقتارىنا اۋداننىڭ ونەرپازدارى – ءانشى امانگەلدى شاحارباەۆ، كۇيشىلەر نۇرسۇلتان ەسەنوۆ پەن قايرات جاقىپ ۇلتتىق ونەردىڭ وزىق تۋىندىلارىن ۇسىنىپ، شارانىڭ ءسانىن كەلتىردى.
كەزدەسۋ سوڭىندا نۇرا اۋدانىنىڭ اكىمى باقىتجان مۇقانوۆ ءسوز سويلەپ، حالىق اتىنان اقىنعا ريزاشىلىعىن ءبىلدىردى. ول قۋانىش ماقسۇتوۆتىڭ شىعارماشىلىعى مەن جوباسىنىڭ جاڭا قازاقستاندى قالىپتاستىرۋداعى ماڭىزىن اتاپ ءوتىپ، ءداستۇر بويىنشا يىعىنا شاپان جاۋىپ، اۋدان اكىمىنىڭ قۇتتىقتاۋ حاتىن تابىستادى.
ەل بىرلىگىن، ادال ەڭبەكتى جانە ۇلتتىق رۋحتى دارىپتەگەن مازمۇندى كەش نۇرالىق كورەرمەننىڭ جۇرەگىنەن ەرەكشە ورىن الدى.
